តេអេរ៉ង់៖ ក្រសួងការបរទេសអ៊ីរ៉ង់ បានថ្កោលទោសការគំរាមកំហែង នាពេលថ្មីៗនេះ របស់ប្រធានាធិបតីអាមេរិក លោក ដូណាល់ ត្រាំ ក្នុងការទម្លាក់គ្រាប់បែកលើប្រទេសអ៊ីរ៉ង់ ដោយហៅការកត់សម្គាល់នេះថា ជាការបំពានច្បាប់អន្តរជាតិ និងបានកោះហៅបេសកជនរបស់ប្រទេសស្វីស ប្រចាំទីក្រុងតេអេរ៉ង់ ដើម្បីតវ៉ាជាផ្លូវការ ។
អ្នកនាំពាក្យក្រសួងលោក Esmaeil Baghaei នៅក្នុងការបង្ហោះនៅលើប្រព័ន្ធផ្សព្វផ្សាយសង្គម X បានបរិហារសេចក្តីថ្លែងការណ៍របស់លោក ត្រាំ ថាជា “ការប្រមាថដ៏គួរឱ្យភ្ញាក់ផ្អើល ចំពោះខ្លឹមសារនៃសន្តិភាព និងសន្តិសុខអន្តរជាតិ” ហើយបានចោទប្រកាន់មេដឹកនាំ សហរដ្ឋអាមេរិករូបនេះថា បានរំលោភលើធម្មនុញ្ញ អង្គការសហប្រជាជាតិ និងធ្វើឱ្យខូចដល់ការការពារ ក្រោមទីភ្នាក់ងារថាមពលអាតូមិកអន្តរជាតិ (IAEA) ។
បេសកជនជនជាតិស្វីស ដែលតំណាងឱ្យផលប្រយោជន៍ របស់សហរដ្ឋអាមេរិកក្នុងប្រទេសអ៊ីរ៉ង់ ត្រូវបានប្រគល់ឱ្យមានការតវ៉ាជាផ្លូវការ ក្នុងអំឡុងពេលកិច្ចប្រជុំ ជាមួយមន្ត្រីអ៊ីរ៉ង់។ ទីក្រុងតេអេរ៉ង់បានព្រមានថា ខ្លួននឹងឆ្លើយតប “យ៉ាងម៉ឺងម៉ាត់ និងឆាប់រហ័ស” ចំពោះការឈ្លានពានណាមួយ នេះបើយោងតាមសេចក្តីថ្លែងការណ៍របស់ក្រសួងមួយ ។
នៅក្នុងនោះដែរជាការឆ្លើយតប ទីប្រឹក្សារបស់មេដឹកនាំកំពូលអ៊ីរ៉ង់ បានព្រមានថា ប្រសិនបើសហរដ្ឋអាមេរិក ឬអ៊ីស្រាអែល វាយប្រហារលើប្រទេសអ៊ីរ៉ង់ ក្រោមហេតុផលនៃការព្រួយ បារម្ភអំពីនុយក្លេអ៊ែរ ប្រទេសនេះនឹងត្រូវបង្ខំឱ្យបន្តការអភិវឌ្ឍអាវុធនុយក្លេអ៊ែរ នេះបើយោងតាមទីភ្នាក់ងារ សារព័ត៌មានផ្លូវការអ៊ីរ៉ង់ IRNA ។
លោក Ali Larijani ទីប្រឹក្សារបស់មេដឹកនាំកំពូល អ៊ីរ៉ង់ លោក Ali Khamenei បានធ្វើការកត់សម្គាល់នេះ ដើម្បីឆ្លើយតបទៅនឹង ការគំរាមកំហែងប្រឆាំង នឹងទីក្រុងតេអេរ៉ង់នាពេលថ្មីៗនេះ ដែលធ្វើឡើងដោយប្រធានាធិបតីអាមេរិកលោក ដូណាល់ ត្រាំ និងអ៊ីស្រាអែល នេះបើយោងតាមការចុះផ្សាយរបស់ទីភ្នាក់ងារសារ ព័ត៌មានចិនស៊ិនហួ។
លោក Larijani បានកត់សម្គាល់ថា អ៊ីរ៉ង់ត្រូវបានហាមឃាត់មិនឱ្យទទួលបានអាវុធនុយក្លេអ៊ែរ ក្រោមការណែនាំសាសនាដែលចេញដោយលោក Khamenei ។ ទោះបីជាយ៉ាងណាក៏ដោយ លោកបានបន្ថែមថា “ប្រសិនបើសហរដ្ឋអាមេរិកធ្វើខុសណាមួយ អ៊ីរ៉ង់នឹងត្រូវបង្ខំឱ្យបន្តអាវុធនុយក្លេអ៊ែរ ដោយសារសម្ពាធពីប្រជាជនរបស់ខ្លួន”។
លោក Larijani បានសង្កត់ធ្ងន់ថា ការចាត់វិធានការ យោធាប្រឆាំងនឹងអ៊ីរ៉ង់ នឹងមានផលវិបាក ដោយថា កម្មវិធីនុយក្លេអ៊ែររបស់អ៊ីរ៉ង់ នឹងមិនត្រូវបានបំផ្លាញ តាមរយៈការទម្លាក់គ្រាប់បែកនោះទេ។ លោកបន្ដថា ការចរចាដោយប្រយោលដែលមានសក្តានុពលណាមួយជាមួយសហរដ្ឋអាមេរិក នឹងមានគោលបំណងស្វែងយល់ពីការទាមទាររបស់គ្នា ទៅវិញទៅមក និងការទទួលបានសម្បទានទៅវិញទៅមកទាក់ទងនឹងបញ្ហានុយក្លេអ៊ែរ។
លោក ត្រាំ នៅក្នុងបទសម្ភាសន៍ជាមួយ NBC News កាលពីថ្ងៃអាទិត្យ បានគំរាមចាប់ផ្តើម “ការវាយប្រហារយោធាដែលមិនធ្លាប់មានពីមុនមក” លើប្រទេសអ៊ីរ៉ង់ ប្រសិនបើខ្លួនបដិសេធមិនចរចាលើកម្មវិធីនុយក្លេអ៊ែររបស់ខ្លួន។ លោកបានបន្ដថា “ប្រសិនបើពួកគេមិនធ្វើកិច្ចព្រមព្រៀងទេ វានឹងមានការទម្លាក់គ្រាប់បែកដូចដែលពួកគេមិនដែលឃើញពីមុនមក” ដោយអះអាងថា មន្ត្រីសហរដ្ឋអាមេរិក និងអ៊ីរ៉ង់កំពុង “ជជែកគ្នា” ដោយមិនផ្តល់ព័ត៌មានលម្អិតនោះទេ៕
ប្រែសម្រួល ឈូក បូរ៉ា
