បរទេស៖ទីភ្នាក់ងារចិនស៊ិនហួចេញផ្សាយ នៅថ្ងៃនេះបានឲ្យដឹងថា នាយករដ្ឋមន្ត្រីជប៉ុន លោក Shigeru Ishiba បានសន្យាកាលពីថ្ងៃអង្គារថា នឹងផ្តល់ការគាំទ្រផ្នែកហិរញ្ញវត្ថុ និង លទ្ធកម្មដល់ក្រុមហ៊ុន ក្នុងស្រុកជាការឆ្លើយតបទៅនឹង ពន្ធបន្ថែមរបស់ សហរដ្ឋអាមេរិក លើរថយន្តនាំចូល។
ក្នុងអំឡុងសន្និសីទសារព័ត៌មាន លោក Ishiba បាននិយាយថា ប្រសិនបើសហរដ្ឋអាមេរិក អនុវត្តពន្ធ២៥ភាគរយ លើការនាំចូលរថយន្ត រដ្ឋាភិបាល នឹងបង្កើតការិយាល័យ ពិគ្រោះយោបល់ ដែលបានកំណត់នៅប្រហែល ១,០០០ទីតាំងនៅទូទាំងប្រទេសជប៉ុន ដើម្បីបំពេញតម្រូវការមូល និធិរបស់ក្រុមហ៊ុនដែលរងផលប៉ះពាល់។
លោក Ishiba បាននិយាយថា ៖ ប្រទេសជប៉ុន គឺជាអ្នកវិនិយោគធំជាងគេនៅសហរដ្ឋអាមេរិក ហើយដោយកត់សំគាល់ ថារដ្ឋាភិបាលរបស់គាត់ នឹងបន្តជំរុញឱ្យ សហរដ្ឋអាមេរិក លើកលែងការនាំចេញ ដែលពឹងផ្អែកលើប្រទេសជប៉ុន ពីពន្ធបន្ថែមលើរថយន្ត និងផលិតផលផ្សេងទៀត។
សន្និសិទសារព័ត៌មាននេះត្រូវបានធ្វើឡើង មួយថ្ងៃបន្ទាប់ពីសភា នៃប្រទេសជប៉ុន បានអនុម័ត ថវិការដ្ឋចំនួន១១៥,២០ ពាន់ពាន់លានយ៉េនឬប្រហែល ជា៧៧០ពាន់លានដុល្លារ សម្រាប់សារពើពន្ធឆ្នាំ២០២៥ ដែលបានចាប់ផ្តើម អនុវត្តកាលពីថ្ងៃអង្គារម្សិលមិញ។
ក្នុងនោះផងដែរលោកIshiba ក៏បានសន្យាថានឹងចាត់វិធានការ ដើម្បីជួយប្រជាជនទប់ទល់ នឹងការកើនឡើងនៃតម្លៃអង្ករ ប្រេងសាំង និងទំនិញប្រើប្រាស់ប្រចាំថ្ងៃផ្សេងទៀត ទោះបីជាគាត់នៅតែស្ទាក់ស្ទើរ ក្នុងការកាត់បន្ថយអត្រាពន្ធ លើការប្រើប្រាស់ លើម្ហូបអាហារក៏ដោយ៕
ប្រែសម្រួល៖ស៊ុនលី
