បរទេស៖ មន្ត្រីផ្នែកសុវត្ថិភាពរបស់ប្រទេសថៃ បាននិយាយថា ការធ្វើតេស្តដែក និងដែកធ្នឹម ដែលប្រើសម្រាប់ពង្រឹងបេតុង ពីអគារបាងកក ដែលបានដួលរលំកំឡុង ពេលរញ្ជួយដីកាលពីសប្តាហ៍មុន បានរកឃើញថា ដែកមួយចំនួនដែល ប្រើប្រាស់គឺទាបជាងស្តង់ដារ។
យោងតាមសារព័ត៌មាន VN Express ចេញផ្សាយកាលពីថ្ងៃទី២ ខែមេសា ឆ្នាំ២០២៥ បានឱ្យដឹងថា អគារកម្ពស់ ៣០ ជាន់ដែលនៅតែកំពុងសាង សង់គឺសម្រាប់ធ្វើជា ការិយាល័យរដ្ឋាភិបាល ប៉ុន្តែការរញ្ជួយបានកាត់ បន្ថយរចនាសម្ព័ន្ធ ទៅជាគំនរបាក់បែកក្នុងរយៈពេលប៉ុន្មានវិនាទី ដោយបានសម្លាប់មនុស្សយ៉ាងហោចណាស់ ១៣នាក់ និងរបួស ៩ នាក់ទៀត។
វាជាឧបទ្ទវហេតុដែលមានមនុស្ស ស្លាប់នៅក្នុងប្រទេសថៃ បន្ទាប់ពីការរញ្ជួយដីកម្រិត ៧.៧ រិចទ័រកាលពីថ្ងៃសុក្រ ដោយអ្នកស្លាប់ចំនួន ២០ នាក់ភាគច្រើននៃព្រះរាជាណាចក្រនេះ ដែលត្រូវបានគេគិតថា ជាកម្មករនៅលើការដ្ឋានសំណង់ ហើយមនុស្សប្រហែល ៧០នាក់ នៅតែជាប់នៅក្រោម គំនរថ្មបាក់បែក។
នាយករដ្ឋមន្ត្រីថៃលោក Paetongtarn Shinawatra ដែលបានបញ្ជា ឱ្យស៊ើបអង្កេតលើសម្ភារៈ និងស្តង់ដារសុវត្ថិភាព នៅកន្លែងសាងសង់ បាននិយាយថា “យើងត្រូវស៊ើបអង្កេតកន្លែង ដែលកំហុសបានកើតឡើង” ៕
ប្រែសម្រួលៈ ណៃ តុលា
