បរទេស ៖ យោងតាមការចេញផ្សាយរបស់ RT អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ថា បេសកជនសេដ្ឋកិច្ច របស់ប្រធានាធិបតីរុស្ស៊ី លោក Vladimir Putin គឺលោក Kirill Dmitriev អាចធ្វើទស្សនកិច្ចនៅទីក្រុងវ៉ាស៊ីនតោន នាពេលខាងមុខ។
ដំណឹងនេះត្រូវបានគេរាយការណ៍ នៅក្នុងប្រព័ន្ធផ្សព្វផ្សាយលោកខាងលិចថា លោក Dmitriev ដែលជាប្រធានមូលនិធិទ្រព្យសម្បត្តិ អធិបតេយ្យរបស់រុស្ស៊ីអាចធ្វើដំណើរ ទៅកាន់សហរដ្ឋអាមេរិក នៅចុងសប្តាហ៍នេះ សម្រាប់កិច្ចពិភាក្សាជាមួយអ្នកចរចារបស់ប្រធានាធិបតី Donald Trump សម្រាប់ការដោះស្រាយជម្លោះអ៊ុយក្រែនលោក Steve Witkoff ។
កិច្ចប្រជុំនេះ ត្រូវបានគេរាយការណ៍ថា នឹងមានបំណង ពង្រឹងទំនាក់ទំនងរវាងប្រទេសទាំងពីរបន្ថែមទៀត នៅពេលដែលពួកគេស្វែង រកការបញ្ចប់សង្រ្គាមនៅអ៊ុយក្រែនផងនោះ។
ដោយត្រូវបានសាកសួរដើម្បីបញ្ជាក់របាយការណ៍ លោក Peskov បាននិយាយកាលពីថ្ងៃពុធថា៖ដំណើរទស្សនកិច្ចបែបនេះគឺអាចធ្វើទៅបាន ប៉ុន្តែដោយមិនបានផ្តល់ព័ត៌មានលម្អិត ឬកាលបរិច្ឆេទបន្ថែមឡើយ។ លោកបានបន្ថែមថា ទីក្រុងមូស្គូបន្តទំនាក់ទំនងជាមួយក្រុងវ៉ាស៊ីនតោន តាមរយៈបណ្តាញផ្សេងៗ ទាំងបញ្ហាការទូត និងជម្លោះអ៊ុយក្រែនដែរ។
គួរឲ្យដឹងដែរថាមុននេះបន្តិចលោក Dmitriev ក៏បានឆ្លើយតបទៅនឹង របាយការណ៍ស្តីពីផែនការធ្វើដំណើររបស់គាត់ជាមួយនឹងការបង្ហោះនៅលើ X ដោយសរសេរថា យើងប្រហែល ជាអាចធ្វើទៅរួច ហើយបន្ថែមថា ចុះប្រសិនបើទំនាក់ទំនង ដែលប្រសើរឡើង គឺពិតជាអ្វីដែលពិភពលោក ត្រូវការសម្រាប់សន្តិសុខ និងសន្តិភាពពិភពលោក យូរអង្វែងជាមិនខាន៕
ប្រែសម្រួល៖ស៊ុនលី
