បរទេស៖ នៅពេលដែលគោលនយោបាយពាណិជ្ជកម្មគាំពារនិយមរបស់សហរដ្ឋអាមេរិកកាន់តែខ្លាំងឡើងនៅក្រោមរដ្ឋបាលលោក ត្រាំ ប្រជាជាតិអាហ្រ្វិកអាចនឹងត្រូវបានបង្ខំឱ្យវាយតម្លៃឡើងវិញនូវយុទ្ធសាស្រ្តសេដ្ឋកិច្ចរបស់ពួកគេហើយងាកទៅរកទីផ្សារស្វាគមន៍កាន់តែច្រើន។
នៅក្នុងបទសម្ភាសន៍ថ្មីៗនេះជាមួយ Xinhua លោក Gift Essinalo អ្នកស្រាវជ្រាវនៅមជ្ឈមណ្ឌលសម្រាប់សុចរិតភាពសាធារណៈរបស់ប្រទេសម៉ូសំប៊ិក និងជាអតីតអ្នកប្រឹក្សាសេដ្ឋកិច្ចប្រចាំធនាគារពិភពលោក បានឲ្យដឹងថា ផលប៉ះពាល់រយៈពេលវែងនៃវិធីសាស្រ្តជំរុញពន្ធរបស់ទីក្រុងវ៉ាស៊ីនតោនអាចផ្លាស់ប្តូរជាមូលដ្ឋាននៃគំរូពាណិជ្ជកម្មសកល។
លោក Essinalo បានលើកឡើងថា “ខណៈពេលដែលផលប៉ះពាល់ភ្លាមៗលើការនាំចេញរបស់ប្រទេសម៉ូសំប៊ិក ទៅកាន់សហរដ្ឋអាមេរិកមានកម្រិតដោយសារតែកិច្ចសន្យារយៈពេលវែង ជាពិសេសនៅក្នុងវិស័យដូចជា graphite និងលោហៈដ៏មានតម្លៃ រូបភាពកាន់តែទូលំទូលាយកំពុងផ្លាស់ប្តូរនៅពេលដែលកិច្ចសន្យាទាំងនោះផុតកំណត់ ហើយតម្លៃផលិតកម្មកើនឡើង ការប្រកួតប្រជែងរបស់ម៉ូសំប៊ិក នៅក្នុងទីផ្សារសហរដ្ឋអាមេរិក អាចធ្លាក់ចុះ”។
យោងតាមការវិភាគរបស់លោក ការដាក់ពន្ធរបស់លោក ត្រាំ មិនមែនគ្រាន់តែជាឥទ្ធិពលសេដ្ឋកិច្ចប៉ុណ្ណោះទេ ប៉ុន្តែវាក៏ជាឧបាយកលនយោបាយដែលមានបំណងដាក់សម្ពាធលើដៃគូពាណិជ្ជកម្មសំខាន់ៗផងដែរ។
លោកបានលើកឡើងថា “វាគឺអំពីការបង្កើតភាពមិនច្បាស់លាស់ ដើម្បីបង្ខំឱ្យមានការចរចាឡើងវិញ និងសរសេរឡើងវិញនូវច្បាប់នៃពាណិជ្ជកម្មអន្តរជាតិ” ។ “វិនិយោគិនមានការស្ទាក់ស្ទើរក្នុងការដាក់ដើមទុនក្នុងបរិយាកាសមួយដែលច្បាប់ពាណិជ្ជកម្មអាចផ្លាស់ប្តូរត្រឹមរយៈពេលមួយយប់។”
លោក Essinalo បានបន្ដថា សកម្មភាពរបស់លោក ត្រាំ កំពុងជំរុញពិភពលោកឆ្ពោះទៅរកយុគសម័យថ្មីនៃការគាំពារពាណិជ្ជកម្ម នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានបន្តថា “យើងកំពុងមើលឃើញការកើតឡើងនៃបរិយាកាសពាណិជ្ជកម្មពិភពលោកដែលបិទកាន់តែខ្លាំង និន្នាការនេះគំរាមកំហែងដល់ការកាត់បន្ថយឱកាសនាំចេញសម្រាប់ប្រទេសកំពុងអភិវឌ្ឍន៍ និងបញ្ឈប់ការស្ទុះងើបសេដ្ឋកិច្ចពិភពលោក”៕
ប្រែសម្រួល ឈូក បូរ៉ា
