បរទេស៖ យន្តហោះប៉ូលិសខ្នាតតូចមួយគ្រឿង បានធ្លាក់ចូលទៅក្នុងសមុទ្រក្បែរអាកាសយានដ្ឋាន Hua Hin ប្រទេសថៃ កាលពីព្រឹកថ្ងៃសុក្រ បណ្តាលឲ្យមនុស្ស៥នាក់ស្លាប់ ក្នុងនោះមានអាកាសយានិក៣នាក់ និងមនុស្សម្នាក់បាត់ខ្លួន។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២៥ ខែមេសា ឆ្នាំ២០២៥ បានឱ្យដឹងថា មជ្ឈមណ្ឌលសង្គ្រោះបន្ទាន់ 191 បានរាយការណ៍ពីគ្រោះថ្នាក់នៅម៉ោង ៨៖១៥នាទី ព្រឹក ដោយបញ្ជាក់ថា យន្តហោះបានធ្លាក់ក្នុងឈូងសមុទ្រថៃ ចេញពីសណ្ឋាគារ Baby Grande Hua Hin ក្នុងស្រុក Cha-am ខេត្ត Phetchaburi ។
រមណីយដ្ឋានមាត់សមុទ្រមានទីតាំងនៅជិតព្រលានយន្តហោះក្នុងស្រុក Hua Hin នៃខេត្ត Prachap Khiri Khan ដែលមានចម្ងាយប្រហែល ៨ គីឡូម៉ែត្រពីទីប្រជុំជន Hua Hin ។
យន្តហោះ DHC-6-400 Twin Otter កំពុងហោះចេញពីអាកាសយានដ្ឋាន ដោយមានបំណងដឹកអ្នកលោតឆ័ត្រយោងជាច្រើននាក់សម្រាប់ការអនុវត្តហ្វឹកហ្វឺន។
មុនពេលធ្លាក់ មានអាកាសយានិក៣នាក់ អ្នកមេកានិក២នាក់ និងវិស្វករយន្តហោះម្នាក់នៅលើយន្តហោះ នោះ៕
ប្រែសម្រួលៈ ណៃ តុលា
