យេរ៉ូសាឡឹម៖ យោធាអ៊ីស្រាអែល បានចេញការព្រមានជាបន្ទាន់មួយ ដោយបានណែនាំដល់ជនស៊ីវិល និងកម្មករទាំងអស់ ឱ្យជម្លៀសខ្លួនចេញពីកំពង់ផែ សមុទ្រក្រហមចំនួនបី ក្នុងប្រទេសយេម៉ែន ដែលគ្រប់គ្រងដោយកងកម្លាំងហ៊ូទី ដោយលើកឡើងពីហានិភ័យ នៃការវាយប្រហារថ្មីមួយដែលអាចកើតមាន។
នៅក្នុងសេចក្តីថ្លែងការណ៍មួយ នៅលើវេទិកាប្រព័ន្ធផ្សព្វផ្សាយសង្គម X អ្នកនាំពាក្យយោធាអ៊ីស្រាអែល លោក Avichay Adraee បានកំណត់អត្តសញ្ញាណកំពង់ផែ ទាំងនោះដូចជាកំពង់ផែ Ras Isa, Hodeidah និង Al-Salif ។
លោកបានលើកឡើងថា “នរណាម្នាក់ដែលមានវត្តមាននៅកំពង់ផែទាំងនេះត្រូវបានជំរុញឱ្យជម្លៀសចេញ ហើយរក្សាភាពច្បាស់លាស់នៃតំបន់នេះ ដើម្បីធានាសុវត្ថិភាពរបស់ពួកគេរហូតដល់មានការជូនដំណឹងបន្ថែម” ។
ការព្រមាននេះបន្ទាប់ពីមានភាពតានតឹងកើនឡើងក្នុងតំបន់ និងការវាយប្រហារតាមអាកាសរបស់អ៊ីស្រាអែលជាបន្តបន្ទាប់សំដៅលើទីតាំងនានារបស់ក្រុមប្រដាប់អាវុធហ៊ូទី ក្នុងប្រទេសយេម៉ែន។
កាលពីថ្ងៃព្រហស្បតិ៍ រដ្ឋមន្ត្រីការពារជាតិអ៊ីស្រាអែលលោក Israel Katz បានព្រមានក្រុមហ៊ូទី ថាពួកគេនឹងទទួលរងនូវការវាយប្រហារយ៉ាងធ្ងន់ធ្ងរ ប្រសិនបើពួកគេបន្តការវាយប្រហារ លើអ៊ីស្រាអែល មួយថ្ងៃបន្ទាប់ពីសហរដ្ឋអាមេរិកបានប្រកាសថា ខ្លួននឹងបញ្ឈប់ការវាយប្រហារ របស់ខ្លួនលើគោលដៅ ដែលទាក់ទងនឹងក្រុមហ៊ូទី ក្នុងប្រទេសយេម៉ែន៕
ប្រែសម្រួល ឈូក បូរ៉ា
