បរទេស៖ កងទ័ពឥណ្ឌាបានប្រើប្រាស់ រថក្រោះប្រយុទ្ធប្រភេទ T-72 ដើម្បីបំផ្លាញ ប៉ុស្តិ៍ឆ្លងកាត់ព្រំដែន ប៉ាគីស្ថានជាច្រើន ចន្លោះពីថ្ងៃទី ៧ ដល់ថ្ងៃទី ១០ ឧសភា, នេះបើយោងតាមសារព័ត៌មាន ក្នុងស្រុករបស់ឥណ្ឌាបានចេញផ្សាយ។
យោងតាមសារព័ត៌មាន RT ចេញផ្សាយនៅថ្ងៃទី២០ ខែឧសភា ឆ្នាំ២០២៥ បានឱ្យដឹងថា គេហទំព័រ NDTV របស់ឥណ្ឌាបានរាយការណ៍ថា រថក្រោះទាំងនោះត្រូវបានដាក់ នៅទីតាំងមុន ការវាយប្រហារយោធា របស់ប្រទេសឥណ្ឌា លើទីតាំងសង្ស័យភេរវករនៅក្នុងទឹកដី ដែលគ្រប់គ្រងដោយប៉ាគីស្ថាន ដែលមានឈ្មោះកូដថា Operation Sindoor ដើម្បីចាប់យកគោលដៅជាក់លាក់ ដែលត្រូវបានសម្គាល់ដោយកងទ័ព។ តួនាទីសំខាន់របស់រថក្រោះ T-72 គឺបំផ្លាញផ្លូវដែលពួកភេរវករអាចជ្រៀត ចូលទៅក្នុងប្រទេសឥណ្ឌា។
NDTV បានដកស្រង់សំដីវរសេនីយ៍ឯក កងទ័ពឥណ្ឌាបាននិយាយថា “យើងក៏បានវាយលុកទីតាំង របស់សត្រូវដែលជួយសម្រួល ដល់ការជ្រៀតចូល។ យើងដឹងថាប៉ុស្តិ៍ណាខ្លះ ត្រូវបានប្រើប្រាស់ជាមូលដ្ឋាន សម្រាប់ការជ្រៀតចូលដោយសត្រូវ។ ការហៅទូរស័ព្ទដែលមានព័ត៌មានត្រូវបានយក ហើយគោលដៅត្រូវបានវាយប្រហារ” ។
ប្រតិបត្តិការ Operation Sindoor ត្រូវបានចាប់ផ្តើម នៅថ្ងៃទី៧ ខែឧសភា ដើម្បីឆ្លើយតបទៅនឹងការវាយ ប្រហារភេរវកម្មក្នុងខែមេសា នៅតំបន់ Jammu និង Kashmir នៅក្នុងទឹកដីសហភាពឥណ្ឌា ដែលបានឆក់យកជីវិតមនុស្ស ២៦ នាក់ ដែលភាគច្រើនជាភ្ញៀវទេសចរ ។ ប្រទេសឥណ្ឌាបានស្តីបន្ទោសការវាយប្រហារ ទៅលើរណសិរ្សដែលជាការវាយ ប្រហាររបស់ក្រុម Lashkar-e-Taiba ដែលមានមូលដ្ឋាននៅប៉ាគីស្ថាន ខណៈដែលប៉ាគីស្ថាន បានបដិសេធ និងថា ខ្លួនមិនមានការចូលរួមដោយផ្ទាល់ ឬដោយប្រយោលនោះទេ។
ប៉ុន្មានម៉ោងបន្ទាប់ពីមីស៊ីល របស់ឥណ្ឌា បានវាយប្រហារគោលដៅ ប៉ាគីស្ថានកាលពីថ្ងៃទី ៧ ឧសភា ទីក្រុងអ៊ីស្លាម៉ាបាដបានឆ្លើយតបជាមួយ នឹងការវាយប្រហារលើទីតាំងផ្សេងៗនៅ Jammu និង Kashmir ដែលទីក្រុងញូវដែលីបាននិយាយថា បានបណ្តាលឱ្យមនុស្សយ៉ាង ហោចណាស់ ១៦ នាក់ស្លាប់ និងរាប់សិបនាក់រងរបួស៕
ប្រែសម្រួលៈ ណៃ តុលា
