វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានប្រកាសនូវប្រព័ន្ធខែលការពារមីស៊ីលតម្លៃ ១៧៥ ពាន់លានដុល្លារអាមេរិក ដែលមានឈ្មោះថា “Golden Dome” ដោយតែងតាំងឧត្តមសេនីយអវកាសអាមេរិកលោក Michael Guetlein ឱ្យដឹកនាំនូវអ្វីដែលលោក ត្រាំ បានពិពណ៌នាថា ជាគំនិតផ្តួចផ្តើម “Manhattan Project-scale” ។
ក្នុងអំឡុងពេលនៃការប្រកាសរបស់ការិយាល័យ Oval អមដោយរដ្ឋមន្ត្រីការពារជាតិអាមេរិកលោក Pete Hegseth និងលោក Guetlein លោក ត្រាំ បានបង្ហាញថា គម្រោងនេះនឹងត្រូវបញ្ចប់ក្នុងរយៈពេលបីឆ្នាំ ហើយនឹងការពារទ្វីបអាមេរិកទាំងមូល រួមទាំងប្រទេសកាណាដាពីការគំរាមកំហែងពីលើអាកាសផងដែរ។
លោក ត្រាំ បានថ្លែងថា “វាជាថ្ងៃដ៏អស្ចារ្យសម្រាប់អាមេរិក ដោយអង្គុយក្បែរផ្ទាំងរូបភាពដែលបង្ហាញទ្វីបអាមេរិកលាបមានពណ៌មាសជាមួយនឹងរូបភាពសិល្បៈនៃការស្ទាក់ចាប់មីស៊ីល។ ការរចនានេះសម្រាប់ Golden Dome នឹងរួមបញ្ចូលជាមួយសមត្ថភាពការពារជាតិ ដែលមានស្រាប់របស់យើង ហើយគួរតែដំណើរការពេញលេញមុនពេលចុងបញ្ចប់នៃអាណត្តិរបស់ខ្ញុំ”។
ប្រព័ន្ធនេះត្រូវបានរចនាឡើង ដើម្បីបង្កើតបណ្តាញដ៏ទូលំទូលាយនៃផ្កាយរណប ដែលមានសមត្ថភាពចាប់សញ្ញា តាមដាន និងស្ទាក់ចាប់មីស៊ីលដែលចូលមកវាយប្រហារ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក ត្រាំ បានលើកឡើងថា ប្រព័ន្ធនេះនឹងមាន “សមត្ថភាពស្ទាក់ចាប់កាំជ្រួច បើទោះបីជាពួកវាត្រូវបានបាញ់ចេញពីផ្នែកផ្សេងៗនៃពិភពលោក និងបើទោះបីជាពួកគេត្រូវបានបាញ់ចេញពីលំហអាកាសក៏ដោយ”៕
ប្រែសម្រួល ឈូក បូរ៉ា
