យេរ៉ូសាឡឹម៖ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានឲ្យដឹងថា តំបន់ទាំងអស់នៃតំបន់ហ្គាហ្សាស្ទ្រីប នឹងស្ថិតនៅក្រោមការគ្រប់គ្រងសន្តិសុខរបស់អ៊ីស្រាអែល ហើយក្រុមហាម៉ាស់ នឹងត្រូវកម្ចាត់ដោយការបញ្ចប់នៃ “ប្រតិបត្តិការ Gideon’s Chariots” ដែលកំពុងបន្តរបស់ខ្លួន។
លោក ណេតាន់យ៉ាហ៊ូ បានពណ៌នាអំពីប្រតិបត្តិការនេះ ដែលលោកបានលើកឡើងថា បានចាប់ផ្តើមកាលពីថ្ងៃសៅរ៍សប្ដាហ៍ជា “ដំណាក់កាលចុងក្រោយ” នៃយុទ្ធនាការយោធារបស់អ៊ីស្រាអែល។
យុទ្ធនាការនោះត្រូវបានចាប់ផ្តើម បន្ទាប់ពីការវាយប្រហារដឹកនាំដោយក្រុមហាម៉ាស់ នៅថ្ងៃទី៧ ខែតុលា ឆ្នាំ២០២៣ ដែលបានសម្លាប់មនុស្សប្រហែល ១ ២០០ នាក់ក្នុងប្រទេសអ៊ីស្រាអែល។
នាយករដ្ឋមន្រ្តីអ៊ីស្រាអែលរូបនេះ បានលើកឡើងថា “កងកម្លាំងរបស់យើង កំពុងវាយលុកយ៉ាងខ្លាំងក្លា ដែលនឹងកាន់តែខ្លាំងប្រឆាំងនឹងទីតាំងរឹងមាំរបស់ក្រុមហាម៉ាស់ ដែលនៅតែមានវត្ដមាននៅក្នុងតំបន់ហ្គាហ្សា” ដោយបន្ថែមថា ប្រតិបត្តិការនេះ គឺសំដៅដល់ការបញ្ចប់សង្រ្គាមនៅក្នុងតំបន់ហ្គាហ្សា”។
លោកក៏បានឲ្យដឹងផងដែរថា លោក Mohammed Sinwar មេដឹកនាំយោធារបស់ក្រុមហាម៉ាស់ និងជាប្អូនប្រុសរបស់អតីតមេដឹកនាំក្រុមហាម៉ាស់ លោក Yahya Sinwar ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលនាពេលថ្មីៗនេះ នៅតំបន់ហ្គាហ្សាភាគខាងត្បូង។
បើទោះបីជាមានការអះអាងបែបនេះក្ដី ប៉ុន្ដែមិនទាន់មានការបញ្ជាក់ជាផ្លូវការណាមួយពីភាគីអ៊ីស្រាអែល និងក្រុមហាម៉ាស់ អំពីការស្លាប់របស់លោក Mohammed Sinwar នៅឡើយទេ។
លោក ណេតាន់យ៉ាហ៊ូ បានបញ្ជាក់ថា ការវាយប្រហារកាលពីថ្ងៃទី ១៣ ខែឧសភា លើមន្ទីរពេទ្យអឺរ៉ុប ក្នុងក្រុង Khan Younis គឺសំដៅទៅលើលោក Mohammed Sinwar។ យោងតាមមន្ត្រីប៉ាឡេស្ទីនបានឲ្យដឹងថា ការវាយប្រហារនេះបានបណ្តាលឲ្យមានការខូចខាត និងមានអ្នករបួសយ៉ាងធ្ងន់ធ្ងរ។
អាជ្ញាធរសុខាភិបាលដែលមានមូលដ្ឋាននៅតំបន់ហ្គាហ្សា បានឲ្យដឹងថា យ៉ាងហោចណាស់មនុស្ស ៦នាក់ត្រូវបានសម្លាប់ និង ៤០នាក់ផ្សេងទៀតបានរងរបួស នៅក្នុងការវាយប្រហារនេះ៕
ប្រែសម្រួល ឈូក បូរ៉ា
