តេអេរ៉ង់៖ រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានព្រមានថា ប្រទេសនេះនឹងមិនស្ទាក់ស្ទើរក្នុងការឆ្លើយតបដោយបង្ខំ ចំពោះការបំពានណាមួយ ហើយនឹងខិតខំប្រឹងប្រែង ដើម្បីការពារផលប្រយោជន៍ និងប្រជាជនរបស់ខ្លួន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានធ្វើការកត់សម្គាល់នៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គម X ខណៈពេលដែលចង្អុលទៅរបាយការណ៍កាលពីថ្ងៃអង្គារដោយ CNN ដែលដកស្រង់ “ព័ត៌មានជាច្រើន” របស់មន្រ្តីសហរដ្ឋអាមេរិកបានឲ្យដឹងថា សហរដ្ឋអាមេរិកបានទទួលការស៊ើបការណ៍សម្ងាត់ថ្មី “ដែលបង្ហាញថា អ៊ីស្រាអែល កំពុងរៀបចំការវាយលុករោងចក្រនុយក្លេអ៊ែរអ៊ីរ៉ង់” ។
ដោយពណ៌នាផែនការរបស់អ៊ីស្រាអែលដែលបានរាយការណ៍ថា “ខុសច្បាប់” និង “គួរឱ្យព្រួយបារម្ភ” លោក Araghchi បានអំពាវនាវឱ្យមានការថ្កោលទោសជាបន្ទាន់ពីក្រុមប្រឹក្សាសន្តិសុខអង្គការសហប្រជាជាតិ និងទីភ្នាក់ងារថាមពលបរមាណូអន្តរជាតិ (IAEA) ។ លោកបានកត់សម្គាល់ថា នៅក្នុងលិខិតផ្ញើជូនអគ្គលេខាធិការអង្គការសហប្រជាជាតិ លោក Antonio Guterres និងលោក Rafael Grossi អគ្គនាយក IAEA នៅមុនថ្ងៃនោះ លោកបានអំពាវនាវឱ្យសហគមន៍អន្តរជាតិចាត់វិធានការទប់ស្កាត់ប្រកបដោយប្រសិទ្ធភាពប្រឆាំងនឹងការបន្តការគំរាមកំហែងរបស់អ៊ីស្រាអែល។
លោកបានសង្កត់ធ្ងន់ថា លិខិតនោះគឺជា “ការព្រមានជាមុនអំពីសកម្មភាពដ៏ធ្ងន់ធ្ងរ” ដោយនិយាយថា អ៊ីរ៉ង់នឹងចាត់វិធានការពិសេស ដើម្បីការពារប្រជាជនរបស់ខ្លួន ផលប្រយោជន៍ និងកន្លែងនុយក្លេអ៊ែរ នេះបើយោងតាមទីភ្នាក់ងារសារព័ត៌មានផ្លូវការ IRNA ។ ជាការឆ្លើយតបទៅនឹងការគំរាមកំហែងរបស់អ៊ីស្រាអែលដែលបានរាយការណ៍ លោក Ali-Mohammad Naeini អ្នកនាំពាក្យរបស់កងឆ្មាំបដិវត្តន៍អ៊ីស្លាមអ៊ីរ៉ង់បានឲ្យដឹងថា ប្រសិនបើអ៊ីស្រាអែល ប្រព្រឹត្តអំពើឈ្លានពានណាមួយប្រឆាំងនឹងអ៊ីរ៉ង់នោះ វាពិតជានឹងទទួលបានការឆ្លើយតបយ៉ាងធ្ងន់ធ្ងរ។
របាយការណ៍នៃការត្រៀមលក្ខណៈរបស់អ៊ីស្រាអែល សម្រាប់សកម្មភាពយោធាដ៏មានសក្តានុពលប្រឆាំងនឹងរោងចក្រនុយក្លេអ៊ែររបស់អ៊ីរ៉ង់កើតឡើង ខណៈដែលគណៈប្រតិភូអ៊ីរ៉ង់ និងសហរដ្ឋអាមេរិកមកទល់ពេលនេះបានធ្វើការចរចាដោយប្រយោលចំនួនបួនចាប់តាំងពីខែមេសា ស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ និងការដកទណ្ឌកម្មរបស់សហរដ្ឋអាមេរិក ហើយត្រូវបានគេរំពឹងថានឹងរៀបចំជុំទីប្រាំនៅទីក្រុងរ៉ូមនៅថ្ងៃសុក្រ៕
ប្រែសម្រួល ឈូក បូរ៉ា
