កងទ័ពឥណ្ឌា បង្ហាញសព្វាវុធផលិតក្នុងស្រុករួមមាន យន្តហោះគ្មានមនុស្សបើក និងបច្ចេកវិទ្យាប្រឆាំងនឹងយន្តហោះគ្មានមនុស្សបើក

បរទេស៖ អគ្គសេនាធិការកងទ័ពឥណ្ឌា លោកឧត្តមសេនីយ Upendra Dwivedi កាលពីថ្ងៃអង្គារ បានធ្វើជាសាក្សីក្នុងបង្ហាញយន្តហោះគ្មានមនុស្សបើក (UAV), បច្ចេកវិទ្យាប្រឆាំងយន្តហោះគ្មានមនុស្សបើក និងគ្រាប់បែកមានស្លាប (ដែលគេស្គាល់ថាជាយន្តហោះគ្មានមនុស្សបើក kamikaze) ។

យោងតាមសារព័ត៌មាន RT ចេញផ្សាយនៅថ្ងៃទី២៨ ខែឧសភា ឆ្នាំ២០២៥ បានឱ្យដឹងថា មន្ត្រីយោធាបាននិយាយថា ការបង្ហាញនេះបានធ្វើឡើងនៅទីលានបាញ់ Babina Field ក្នុងរដ្ឋ Uttar Pradesh ភាគខាងជើងប្រទេសឥណ្ឌា។

តួនាទីរបស់យន្តហោះគ្មានមនុស្សបើក kamikaze ត្រូវបានសាទរក្នុងអំឡុងពេលប្រតិបត្តិការ Sindoor ថ្មីៗនេះរបស់កងទ័ពឥណ្ឌា។ យោងតាមរបាយការណ៍ផ្លូវការ អាវុធបានអនុញ្ញាតឱ្យកំណត់គោលដៅច្បាស់លាស់នៃហេដ្ឋារចនាសម្ព័ន្ធយោធាប៉ាគីស្ថាន។

ទីក្រុងញូវដេលីបាននិយាយថា ខ្លួនកំពុងឆ្លើយតបទៅនឹងការវាយប្រហារ ភេរវកម្មនៅក្នុងទឹកដីសហព័ន្ធ Jammu និង Kashmir របស់ឥណ្ឌាកាលពីចុងខែមេសា ដែលបានសម្លាប់អ្នកទេសចរ 26 នាក់។ ទីក្រុងអ៊ីស្លាម៉ាបាដបានបដិសេធការជាប់ពាក់ព័ន្ធណាមួយ។

រដ្ឋទាំងពីរបានជាប់ពាក់ព័ន្ធនឹងជម្លោះ លើទឹកដីអស់ជាច្រើនទសវត្សរ៍មកហើយ។ ការកើនឡើងថ្មីៗនេះបានលាតត្រដាងនៅថ្ងៃទី 7 ខែឧសភា; បីថ្ងៃក្រោយមក បន្ទាប់ពីការប្រយុទ្ធគ្នាដ៏ខ្លី ប៉ុន្តែមានភាពតានតឹង ឥណ្ឌា និងប៉ាគីស្ថាន បានយល់ព្រមលើបទឈប់បាញ់មួយ ៕

ប្រែសម្រួលៈ ណៃ តុលា