បរទេស៖ បន្ទាប់ពីការរញ្ជួយដីកម្រិត ៤.៥រ៉ិចទ័រ នាយកដ្ឋានបានបានត្រួតពិនិត្យទំនប់ចំនួន ១១ ដែលមានចម្ងាយ ២៥ គីឡូម៉ែត្រនៃចំណុចកណ្តាលរញ្ជួយ។
យោងតាមសារព័ត៌មាន The Nation ចេញផ្សាយ នៅថ្ងៃទី៣ ខែមិថុនា ឆ្នាំ២០២៥ បានឱ្យដឹងថា នាយកដ្ឋានធារាសាស្រ្ត បានត្រួតពិនិត្យទំនប់ចំនួន ១១ នៅក្នុងខេត្តឈៀងម៉ៃ បន្ទាប់ពីគ្រោះរញ្ជួយដីកម្រិត ៤.៥ រិចទ័រ ដែលបានកើតឡើង កាលពីថ្ងៃចន្ទ ទី២ ខែមិថុនា នៅក្នុងឃុំ Mae Pang ស្រុក Phrao ។ នាយកដ្ឋានបានបញ្ជាក់ថា ទំនប់ទាំងអស់នៅតែរឹងមាំ មានស្ថិរភាព និងមានសុវត្ថិភាព១០០%។
នៅវេលាម៉ោង ២:០៧នាទី រសៀល គ្រោះរញ្ជួយដីបានវាយប្រហារខេត្តភាគខាងជើង ដែលមានចំណុចកណ្តាល ជម្រៅ ១ គីឡូម៉ែត្រ។ ក្រោយការរញ្ជួយដីនេះ នាយកដ្ឋានបានឆ្លើយតបភ្លាមៗដោយចុះពិនិត្យទំនប់ទឹកក្នុងខេត្ត ដើម្បីធានាសុវត្ថិភាពសាធារណៈ និងការគ្រប់គ្រងទឹកក្នុងប្រទេស។
លោក Suriyapol Nuchanong អគ្គនាយក នៃនាយកដ្ឋានធារាសាស្ត្រ បាននិយាយថា ឧបករណ៍វាស់ស្ទង់ការរញ្ជួយដីមួយ ត្រូវបានគេប្រើប្រាស់ ដើម្បីត្រួតពិនិត្យទំនប់ Mae Ngat Somboon Chon ក្នុងស្រុក Mae Taeng ដែលមានចម្ងាយ ប្រហែលជាង ១៥គីឡូម៉ែត្រ ពីចំណុចកណ្តាលនៃការរញ្ជួយដី។
លោកបានបន្តថា ការបង្កើនល្បឿនអតិបរមា ដែលបានកត់ត្រា នៅចុងទំនប់គឺបង្ហាញថា ទំនប់មានស្ថិរភាព និងរឹងមាំតាមស្តង់ដារវិស្វកម្ម៕
ប្រែសម្រួលៈ ណៃ តុលា
