អ៊ីស្តង់ប៊ុល៖ រដ្ឋមន្ត្រីការបរទេសតួកគី លោក Hakan Fidan និងរដ្ឋមន្ត្រីការបរទេសអាមេរិកលោក Marco Rubio បានពិភាក្សាគ្នាអំពីកិច្ចខិតខំប្រឹងប្រែង ដើម្បីបញ្ចប់សង្រ្គាមនៅអ៊ុយក្រែន និងការអភិវឌ្ឍន៍ក្នុងតំបន់កាន់តែទូលំទូលាយ ក្នុងអំឡុងពេលការសន្ទនាតាមទូរស័ព្ទកាលពីថ្ងៃអង្គារ។
មន្ត្រីទាំងពីរបានពិនិត្យឡើងវិញនូវជំហានថ្មីៗ ដើម្បីកាត់បន្ថយជម្លោះរវាងរុស្ស៊ី និងអ៊ុយក្រែន រួមទាំងលទ្ធផលនៃកិច្ចចរចាសន្តិភាពថ្មី ដែលបានធ្វើឡើងនៅទីក្រុងអ៊ីស្តង់ប៊ុល កាលពីថ្ងៃចន្ទ។
នៅក្នុងការចរចាលើកទីពីរ – បន្ទាប់ពីកិច្ចប្រជុំដំបូងនៅថ្ងៃទី១៦ ខែឧសភា – គណៈប្រតិភូអ៊ុយក្រែន និងរុស្ស៊ី ត្រូវបានគេរាយការណ៍ថា បានឈានដល់កិច្ចព្រមព្រៀងបឋម ស្តីពីបញ្ហាមនុស្សធម៌ជាច្រើន។
ទាំងនេះរួមបញ្ចូលទាំងការផ្លាស់ប្តូរអ្នកទោសដែលបានពង្រីកសម្រាប់ទាហានដែលមានអាយុក្រោម ២៥ឆ្នាំ និងអ្នកដែលរងរបួសធ្ងន់ធ្ងរ ឬឈឺ ក៏ដូចជាការធ្វើមាតុភូមិនិវត្តន៍សាកសពរបស់ទាហានដែលបានធ្លាក់ចំនួន ៦,០០០នាក់មកពីភាគីនីមួយៗ។
តួកគី បាននឹងកំពុងជំរុញឱ្យធ្វើជាម្ចាស់ផ្ទះនៃកិច្ចប្រជុំកំពូលមួយ ដែលមានការចូលរួមពីមេដឹកនាំអ៊ុយក្រែន រុស្ស៊ី និងសហរដ្ឋអាមេរិក ក្នុងគោលបំណង ដើម្បីដាក់មូលដ្ឋានគ្រឹះសម្រាប់ដំណោះស្រាយកាន់តែទូលំទូលាយ ចំពោះជម្លោះនេះ។
ក្រៅពីអ៊ុយក្រែនលោក Fidan និងលោក Rubio ក៏បានផ្លាស់ប្តូរទស្សនៈ ស្តីពីការវិវឌ្ឍន៍នៅក្នុងប្រទេសស៊ីរី និងតំបន់ហ្គាហ្សា ទោះបីជាមិនមានព័ត៌មានលម្អិតបន្ថែមត្រូវបានផ្តល់ឱ្យក៏ដោយ៕
ប្រែសម្រួល ឈូក បូរ៉ា
