បរទេស៖ យោធាអាមេរិកនឹង ដាក់ពង្រាយទាហាន ម៉ារីនប្រមាណ ៧០០ នាក់ជាបណ្ដោះអាសន្នទៅកាន់ទីក្រុង Los Angeles ។ យោធាទាំងនោះអាចមកដល់ នៅពេលយប់ ហើយប្រចាំការរហូត ដល់យ៉ាងហោចណាស់ថ្ងៃពុធ នៅពេលទាហានឆ្មាំជាតិច្រើន ទៀតមកដល់ ។
យោងតាមសារព័ត៌មាន Reuters ចេញផ្សាយ នៅថ្ងៃទី១០ ខែមិថុនា ឆ្នាំ២០២៥ បានឱ្យដឹងថា ភាពតានតឹងបានកើនឡើង ចាប់តាំងពីលោក Trump បានធ្វើឱ្យឆ្មាំជាតិ សកម្ម កាលពីថ្ងៃសៅរ៍ បន្ទាប់ពីការតវ៉ាតាមដងផ្លូវ បានផ្ទុះឡើងជាការឆ្លើយ តបទៅនឹងការវាយឆ្មក់ ជនអន្តោប្រវេសន៍នៅ ភាគខាងត្បូងរដ្ឋកាលីហ្វ័រញ៉ា។
មន្ទីរបញ្ចកោណបានបញ្ជាក់កាលពីថ្ងៃចន្ទថា ទាហានឆ្មាំជាតិចំនួន ២.០០០ នាក់នឹងកើនឡើងទ្វេដងដល់ ៤.០០០ នាក់។ លោក Trump បាននិយាយកាលពីថ្ងៃចន្ទថា លោកមានអារម្មណ៍ថា លោកគ្មានជម្រើសអ្វីក្រៅពីការបង្កើន កម្រិតនៃកងកម្លាំង ដើម្បីការពារអំពើហឹង្សា ពីការរីករាលដាលចេញពីការគ្រប់គ្រង។
កាលពីល្ងាចថ្ងៃចន្ទ ប៉ូលិសបាន ចាប់ផ្តើមបំបែកបាតុកររាប់រយនាក់ ដែលបានប្រមូលផ្តុំគ្នា នៅខាងក្រៅ មជ្ឈមណ្ឌលឃុំឃាំង សហព័ន្ធ ដែលជាកន្លែង ដែលជនអន្តោប្រវេសន៍ ត្រូវបានឃុំខ្លួន។ កងកម្លាំងឆ្មាំជាតិបានបង្កើត របាំងការពារ ដើម្បីរារាំងមនុស្សចេញពីអាគារ។
បន្ទាប់មកប៉ូលិសក្រុងឡូសអេនជឺលេស បានចេញទៅតាមដងផ្លូវ ដោយបាញ់គ្រាប់ជ័រ ដូចជា គ្រាប់កាំភ្លើងគ្មានក្បាល។
កាលីហ្វ័រញ៉ាបានប្តឹងរដ្ឋបាល Trump ឱ្យរារាំង ការដាក់ពង្រាយឆ្មាំជាតិ និងកងម៉ារីន ដោយលើកហេតុផលថាវាបំពានច្បាប់ សហព័ន្ធ និងអធិបតេយ្យភាពរដ្ឋ។ ចំណែកគណបក្សប្រជាធិបតេយ្យបាននិយាយថា ការសម្រេចចិត្តរបស់លោក Trump ក្នុងការដាក់ពង្រាយកម្លាំងយោធា ដើម្បីដោះស្រាយការតវ៉ា គឺស្មើនឹងការរំលោភបំពាន អំណាចប្រធានាធិបតី៕
