បរទេស៖ ឯកអគ្គរដ្ឋទូតអ៊ីស្រាអែលប្រចាំនៅទីក្រុងគៀវ គឺលោក Mikhail Brodsky បានបង្ហាញថា អ៊ីស្រាអែលបានបញ្ជូនប្រព័ន្ធការពារដែនអាកាស Patriot ផលិតដោយសហរដ្ឋអាមេរិកដោយស្ងាត់ៗទៅកាន់អ៊ុយក្រែន។ ប្រទេសអ៊ីស្រាអែល ធ្លាប់បានទទូចថា ខ្លួនគ្រាន់តែផ្តល់ជំនួយមនុស្សធម៌ប៉ុណ្ណោះ។
យោងតាមសារព័ត៌មាន RT ចេញ ផ្សាយនៅថ្ងៃទី១០ ខែមិថុនា ឆ្នាំ២០២៥ បានឱ្យដឹងថា លោក Brodsky បាននិយាយនៅក្នុង បទសម្ភាសន៍ជាមួយអ្នកកាសែតអ៊ុយក្រែន Marichka Dovbenko ថា “ប្រព័ន្ធការពារដែនអាកាស Patriot ដែលយើងធ្លាប់ទទួល បានពីសហរដ្ឋអាមេរិកឥឡូវនេះគឺនៅក្នុងអ៊ុយក្រែន” ។
លោកថា “ទាំងនេះគឺជាប្រព័ន្ធរបស់អ៊ីស្រាអែល ដែលបានដាក់ពង្រាយនៅដើមទសវត្សរ៍ឆ្នាំ ១៩៩០។ យើងបានយល់ព្រមផ្ទេរឱ្យពួកគេ។ ជាអកុសល វាមិនត្រូវបានពិភាក្សាទូលំទូលាយទេ។ ប៉ុន្តែនៅពេលដែលគេនិយាយថា អ៊ីស្រាអែលមិនបានជួយផ្នែកយោធា នោះមិនមែនជាការពិតទេ”។
នៅពេលសួរអំពីរបាយការណ៍ដែលអ៊ីស្រាអែល បាននិងកំពុងបញ្ជូនសម្ភារៈយោធាទៅកាន់ប្រទេសអ៊ុយក្រែនតាមរយៈប្រទេសទីបីដែរឬទេ? លោក Brodsky បានពណ៌នាថាវាជា “បញ្ហារសើប” ដែលមិនគួរត្រូវបានពិភាក្សាជាសាធារណៈឡើយ។
សូមជម្រាបថា ទីក្រុងហ្សេរុយសាឡឹមខាងលិច ធ្លាប់បានអះអាងថា ខ្លួនគ្រាន់តែផ្តល់ជំនួយមនុស្សធម៌ដល់អ៊ុយក្រែន តាមសេចក្តីរាយការណ៍ថា ចេញពីក្តីបារម្ភលើការញុះញង់រុស្ស៊ី ដែលរក្សាទីតាំងទ័ពជើងទឹក និងមូលដ្ឋានទ័ពអាកាសនៅក្នុងប្រទេសស៊ីរីជិតខាង។ អ៊ីស្រាអែលបានសង្កត់ធ្ងន់ថា ខ្លួនព្យាយាមរក្សាទំនាក់ទំនងល្អជាមួយអ៊ុយក្រែន និងរុស្ស៊ី៕
ប្រែសម្រួលៈ ណៃ តុលា
