ឡូសអេនជឺឡេស៖ មន្ត្រីច្បាប់កំពូលៗ នៅក្នុងរដ្ឋកាលីហ្វ័រញ៉ារបស់សហរដ្ឋអាមេរិក បានផ្លាស់ប្តូរដើម្បីបញ្ឈប់ការដាក់ពង្រាយ កងកម្លាំងយោធារបស់លោកប្រធានាធិបតី ដូណាល់ ត្រាំ នៅក្នុងសហគមន៍របស់ពួកគេ ដោយដាក់ញត្តិទៅតុលាការបន្ទាន់ កាលពីថ្ងៃអង្គារដែលបានជំទាស់នឹង សិទ្ធិអំណាចរបស់រដ្ឋាភិបាលសហព័ន្ធ ក្នុងការប្រើប្រាស់កងទ័ព សម្រាប់ការអនុវត្តច្បាប់ក្នុងតំបន់។
អគ្គមេធាវីរដ្ឋកាលីហ្វ័រញ៉ា លោក Rob Bonta និងអភិបាលលោក Gavin Newsom បានស្នើសុំក្នុងឯកសារ ២៨ ទំព័រថា តុលាការសហព័ន្ធចាត់វិធានការជាបន្ទាន់ ដើម្បីរារាំងលោក ត្រាំ រដ្ឋមន្ត្រីការពារជាតិលោក Pete Hegseth និងក្រសួងការពារជាតិសហរដ្ឋអាមេរិក ពីការប្រើប្រាស់បុគ្គលិកយោធា និងអង្គភាពឆ្មាំជាតិសហព័ន្ធរដ្ឋកាលីហ្វ័រញ៉ា ដើម្បីល្បាតសហគមន៍ និងធ្វើសកម្មភាពអនុវត្តច្បាប់។
ក្រុមមន្ត្រីបានអះអាងថា ការដាក់ពង្រាយយោធាបានបំពានច្បាប់សហព័ន្ធ គំរាមកំហែងដល់អធិបតេយ្យភាពរដ្ឋ និងកើនឡើងជាជាងកាត់បន្ថយភាពតានតឹងស៊ីវិល នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ ។
លោក Bonta បានឲ្យដឹងនៅក្នុងសេចក្តីថ្លែងការណ៍ ដែលចេញផ្សាយដោយការិយាល័យ អគ្គមេធាវីរដ្ឋកាលីហ្វ័រញ៉ាថា “ប្រធានាធិបតីកំពុងស្វែងរកការក្លែងបន្លំណាមួយ ដើម្បីដាក់កងកម្លាំងយោធានៅតាមដងផ្លូវអាមេរិក ដើម្បីបំភិតបំភ័យនិងស្ងប់ស្ងាត់អ្នក ដែលមិនយល់ស្របជាមួយលោក “វាមិនត្រឹមតែអសីលធម៌នោះទេ វាថែមទាំងខុសច្បាប់ និងគ្រោះថ្នាក់ទៀតផង”។
ចលនាសង្គ្រោះបន្ទាន់នេះ ធ្វើឡើងបន្ទាប់ពីបណ្តឹង ដែលបានប្តឹងកាលពីថ្ងៃច័ន្ទ ដោយមន្ត្រីដូចគ្នា ដែលជំទាស់នឹងបទបញ្ជារបស់លោក ត្រាំ ក្នុងការដាក់សហព័ន្ធឆ្មាំជាតិកាលីហ្វ័រញ៉ាសម្រាប់រយៈពេល ៦០ ថ្ងៃក្រោមលក្ខន្តិកៈសហព័ន្ធ។ កាលពីព្រឹកថ្ងៃអាទិត្យ ក្រសួងការពារជាតិសហរដ្ឋអាមេរិក បានបញ្ជូនកងទ័ពឆ្មាំជាតិរាប់រយនាក់ពីទីក្រុង San Diego ទៅកាន់ទីក្រុងឡូសអេនជឺឡេស ដោយគ្មានការអនុញ្ញាតពីអ្នកទទួលខុសត្រូវ និងប្រឆាំងនឹងការចង់បាន របស់ការអនុវត្តច្បាប់ក្នុងតំបន់ នេះបើយោងតាមការិយាល័យអគ្គមេធាវី។
គួរបញ្ជាក់ថា គិតត្រឹមថ្ងៃអង្គារម្សិលមិញនេះ រដ្ឋាភិបាលសហព័ន្ធបានបញ្ជា ឱ្យដាក់ពង្រាយកងទ័ពឆ្មាំជាតិចំនួន ៤,០០០ នាក់នៅទូទាំងរដ្ឋកាលីហ្វ័រញ៉ា បូករួមទាំងទាហានម៉ារីនចំនួន ៧០០ នាក់បន្ថែមទៀតទៅកាន់ទីក្រុងធំទីពីររបស់ប្រទេស៕
ប្រែសម្រួល ឈូក បូរ៉ា
