ព្រុចសែល៖ សហភាពអឺរ៉ុប បានប្រកាសកញ្ចប់ទណ្ឌកម្មថ្មីប្រឆាំងនឹងរុស្ស៊ី ដោយថាការវាយប្រហារប្រចាំថ្ងៃរបស់ទីក្រុងម៉ូស្គូ ប្រឆាំងនឹងអ៊ុយក្រែនបង្ហាញថា ប្រទេសរុស្សី មិនចាប់អារម្មណ៍នឹងសន្តិភាពនោះទេ ទោះបីជាមានការខិតខំប្រឹងប្រែងការទូតនាពេលថ្មីៗនេះក៏ដោយ។
កញ្ចប់ថ្មីដែលជាកញ្ចប់ទី ១៨ ចាប់តាំងពីប្រទេសរុស្ស៊ី បានចាប់ផ្តើមការឈ្លានពាន ដោយមិនបង្កហេតុពេញលក្ខណៈរបស់ខ្លួន ប្រឆាំងនឹងប្រទេសជិតខាងរបស់ខ្លួនក្នុងឆ្នាំ ២០២២ ត្រូវបានរចនាឡើងដើម្បីកំណត់ គោលដៅបន្ថែមទៀតចំពោះលទ្ធភាព របស់វិមានក្រឹមឡាំង ក្នុងការរកប្រាក់ពី ផលិតកម្មប្រេង និងឧស្ម័នរបស់ខ្លួន។
សំណើនេះរួមមានការបញ្ចុះ តម្លៃលើការនាំចេញប្រេងរបស់រុស្ស៊ីពី ៦០ ដុល្លារទៅ ៤៥ ដុល្លារក្នុងមួយបារ៉ែល និងណែនាំការហាមឃាត់ ប្រតិបត្តិការពេញលេញលើធនាគារ និងស្ថាប័នហិរញ្ញវត្ថុរុស្ស៊ីនៅក្នុងប្រទេសទីបី ដែលជួយរុស្ស៊ីជៀសផុតពីទណ្ឌកម្មដែលមានស្រាប់។
សហភាពអឺរ៉ុបបានឲ្យដឹងថាខ្លួនក៏ កំពុងស្នើឱ្យមានការហាមឃាត់លើការប្រើប្រាស់ហេដ្ឋារចនាសម្ព័ន្ធថាមពលរបស់រុស្ស៊ី ដោយហាមមិនអោយប្រតិបត្តិករ អឺរ៉ុបណាមួយចូលរួមដោយផ្ទាល់ ឬដោយប្រយោលក្នុងប្រតិបត្តិការណាមួយដែលពាក់ព័ន្ធនឹងបំពង់បង្ហូរ Nord Stream ។
កញ្ចប់ថ្មីនឹងត្រូវអនុម័តដោយ រដ្ឋសមាជិកទាំង ២៧ របស់សហភាពអឺរ៉ុប ។ នោះអាចមានភាពស្មុគស្មាញ ដោយសារការព្រួយបារម្ភពីមុន ដែលលើកឡើងដោយរដ្ឋាភិបាលគាំទ្រវិមានក្រឹមឡាំងមួយចំនួនទៀត ដូចជាប្រទេសហុងគ្រី និងស្លូវ៉ាគី អំពីការដាក់ទណ្ឌកម្មបន្ថែមលើ ប្រទេសរុស្ស៊ី។ ខណៈដែលប្រទេសទាំងពីរពីមុនបានគម្រាមរារាំងការដាក់ទណ្ឌកម្មថ្មី រហូតមកដល់ពេលនេះ ទីបំផុតពួកគេបានបោះឆ្នោតគាំទ្រពួកគេ។
ប្រធានគណៈកម្មការអឺរ៉ុបលោកស្រី Ursula von der Leyen បានឲ្យដឹងថា ទណ្ឌកម្មគឺជាការចាំបាច់ “ព្រោះភាពខ្លាំងជាភាសាតែមួយគត់ដែលរុស្ស៊ីនឹងយល់”។ “យើងចង់បានសន្តិភាពសម្រាប់អ៊ុយក្រែន។ ទោះបីជាមានការប៉ុនប៉ងការទូតជាច្រើនសប្តាហ៍ក៏ដោយ ទោះបីជាប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានផ្តល់បទឈប់បាញ់ដោយគ្មានលក្ខខណ្ឌក៏ដោយ ក៏រុស្ស៊ីនៅតែបន្តនាំមកនូវការស្លាប់ និងការបំផ្លិចបំផ្លាញដល់អ៊ុយក្រែន។ គោលដៅរបស់រុស្ស៊ីមិនមែនសន្តិភាពនោះទេ គឺដាក់នូវការគ្រប់គ្រងអំណាច។
មេដឹកនាំនៃប្រទេសអាល្លឺម៉ង់ បារាំង ចក្រភពអង់គ្លេស និងប៉ូឡូញកាលពីខែមុនបានប្រាប់មេដឹកនាំរុស្ស៊ីលោក វ្ល៉ាឌីមៀ ពូទីន ឱ្យយល់ព្រមបទឈប់បាញ់រយៈពេល ៣០ ថ្ងៃ ឬប្រឈមមុខនឹងទណ្ឌកម្ម “ដ៏ធំ” ដែលអាចកើតមាន។ លោក ពូទីន បានព្រងើយកន្តើយនឹងឱសានវាទ ដោយស្នើជំនួសមកវិញនូវ “ការចរចាដោយផ្ទាល់” រវាងទីក្រុងម៉ូស្គូ និងទីក្រុងគៀវ៕
ប្រែសម្រួល ឈូក បូរ៉ា
