បរទេស៖ ក្រសួងការបរទេសរុស្ស៊ីបានណែនាំពលរដ្ឋខ្លួនប្រឆាំងនឹងការធ្វើដំណើរ ទៅកាន់ប្រទេសអ៊ីស្រាអែល និងអ៊ីរ៉ង់ បន្ទាប់ពីការវាយប្រហារតាមអាកាសរបស់អ៊ីស្រាអែលបានធ្វើកាលពីថ្ងៃសុក្រ។ ពលរដ្ឋរុស្ស៊ីបច្ចុប្បន្នស្ថិតក្នុងប្រទេសអ៊ីស្រាអែល ក៏ត្រូវបានណែនាំឲ្យចាកចេញដែរ។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែមិថុនា ឆ្នាំ២០២៥ បានឱ្យដឹងថា យោធាអ៊ីស្រាអែលបានធ្វើការវាយប្រហារតាមអាកាសជាបន្តបន្ទាប់ទៅលើគោលដៅជាច្រើន – ទាំងទីតាំងយោធា និងទីតាំងនុយក្លេអ៊ែរនៅទូទាំងប្រទេសអ៊ីរ៉ង់កាលពីព្រឹកថ្ងៃសុក្រ។ អាជ្ញាធរអ៊ីរ៉ង់បានបញ្ជាក់ថា ការវាយប្រហារបានសម្លាប់ឧត្តមសេនីយ Hossein Salami មេបញ្ជាការកងឆ្មាំបដិវត្តន៍ឥស្លាមវរជនអ៊ីរ៉ង់ (IRGC) និងឧត្តមសេនីយ Mohammad Bagheri ដែលជាប្រធានបុគ្គលិកនៃកងកម្លាំងប្រដាប់អាវុធអ៊ីរ៉ង់។
ប្រព័ន្ធផ្សព្វផ្សាយជាច្រើនបានអះអាងថា មេបញ្ជាការយោធាអ៊ីរ៉ង់ថ្នាក់ខ្ពស់មួយចំនួនទៀត និងអ្នកវិទ្យាសាស្ត្រនុយក្លេអ៊ែរក៏ត្រូវបានគេសម្លាប់ដែរ។
នៅព្រឹកថ្ងៃដដែល ស្ថានទូតរុស្ស៊ីនៅទីក្រុង Tel Aviv របស់អ៊ីស្រាអែល បានចេញសេចក្តីណែនាំស្រដៀងគ្នានេះ ដោយជំរុញឱ្យជនជាតិរុស្ស៊ី “ដែលមានឱកាស គឺត្រូវចាកចេញពីអ៊ីស្រាអែល” ៕
ប្រែប្រួលៈ ណៃ តុលា
