បរទេស៖ យោងតាមការចេញផ្សាយរបស់ RT ប្រធានាធិបតីរុស្ស៊ី លោក Vladimir Putinបានសន្ទនាតាមទូរស័ព្ទជាមួយសមភាគីអ៊ីរ៉ង់ លោក Masoud Pezeshkian និងនាយករដ្ឋមន្ត្រីអ៊ីស្រាអែល លោក Benjamin Netanyahu ដើម្បីពិភាក្សាអំពីការកើនឡើងនៅតំបន់មជ្ឈិមបូព៌ា បន្ទាប់ពីការវាយប្រហាររបស់អ៊ីស្រាអែលប្រឆាំងនឹងអ៊ីរ៉ង់។
អ៊ីស្រាអែលបានបើកការវាយប្រហារដ៏ធំមួយលើអ៊ីរ៉ង់ពេញមួយយប់សំដៅលើទីតាំងនុយក្លេអ៊ែរ និងការដំឡើងយោធាផ្សេងៗ។ ការវាយប្រហារបានបន្តរហូតដល់ថ្ងៃ បន្ទាប់ហើយដោយបានធ្វើឱ្យខូចខាតសម្ភារៈយ៉ាងច្រើនសន្ធឹកសន្ធាប់ និងរបួសដល់ថ្នាក់ដឹកនាំយោធាកំពូលរបស់អ៊ីរ៉ង់ទៀតផង។
ទីភ្នាក់ងារសារព័ត៌មានរបស់វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា ប្រធានាធិបតីរុស្ស៊ីបានសម្តែងការរំលែកទុក្ខដល់ថ្នាក់ដឹកនាំ និងប្រជាជននៃសាធារណរដ្ឋឥស្លាមអ៊ីរ៉ង់ទាក់ទងនឹងការស្លាប់ និងរបួសរបស់មនុស្សជាច្រើនរួមទាំងជនស៊ីវិលដែលបណ្តាលមកពីការវាយប្រហាររបស់អ៊ីស្រាអែល ។
ប្រទេសរុស្ស៊ី ទោះបីជាយ៉ាងណាក្តីបានប្រកាសថ្កោលទោសទង្វើរបស់អ៊ីស្រាអែល ដែលបំពានធម្មនុញ្ញអង្គការសហប្រជាជាតិ និងច្បាប់អន្តរជាតិនេះបើតាមសេចក្តីថ្លែងការណ៍របស់លោក Putin។
ជាមួយគ្នានេះ មេដឹកនាំរុស្ស៊ីបានសម្តែងការត្រៀមខ្លួនក្នុងការសម្រុះសម្រួល និង បន្តរួមចំណែកដល់ការបន្ថយជម្លោះរវាងអ៊ីរ៉ង់ និងអ៊ីស្រាអែលផងដែរ៕
ប្រែសម្រួល៖ស៊ុន លី
