យេរ៉ូសាឡឹម៖ អ៊ីស្រាអែល កាលពីថ្ងៃសុក្របានបើកការវាយប្រហារទ្រង់ទ្រាយធំ “ទុកជាមុន ច្បាស់លាស់ និង រួមបញ្ចូលគ្នា” លើទីតាំងយោធា និងនុយក្លេអ៊ែរអ៊ីរ៉ង់ ដែលជំរុញឱ្យមានការវាយប្រហារសងសឹកពីទីក្រុងតេអេរ៉ង់ នៅម៉ោង ១រំលងអាធ្រាតឈានចូលថ្ងៃសៅរ៍នេះ។
ក្រុមអ្នកវិភាគបានព្រមានថា ការវាយប្រហារអាចធ្វើឲ្យស្ថានការណ៍ ដឺលប្រែប្រួលរួចទៅហើយនៅមជ្ឈិមបូព៌ាកាន់តែយ៉ាប់យ៉ឺនបន្ថែមទៀត និងបញ្ឆេះភ្លើងសង្គ្រាមនៅក្នុងតំបន់កាន់តែធំ។
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានឲ្យដឹងថា ការវាយប្រហារនេះមានគោលបំណងធ្វើឱ្យខូចហេដ្ឋារចនាសម្ព័ន្ធនុយក្លេអ៊ែររបស់អ៊ីរ៉ង់ ការផលិតមីស៊ីលផ្លោង និងសមត្ថភាពយោធារបស់ប្រទេសនេះ។
លោក ណេតាន់យ៉ាហ៊ូ បានឲ្យដឹងក្នុងសុន្ទរកថាតាមទូរទស្សន៍ ដោយប្តេជ្ញាថាយុទ្ធនាការនេះនឹងបន្ត សម្រាប់រយៈពេលជាច្រើនថ្ងៃតាមដែលវាត្រូវការ ដោយលោកបានអះអាងថា “នេះគឺជាគ្រោះថ្នាក់ច្បាស់លាស់ និងបច្ចុប្បន្នចំពោះការរស់រានមានជីវិតរបស់អ៊ីស្រាអែល”។
កងកម្លាំងការពារអ៊ីស្រាអែល (IDF) បានរាយការណ៍ថា យន្តហោះប្រហែល ២០០គ្រឿងបានចូលរួមក្នុងប្រតិបត្តិការនេះ ដោយបានវាយប្រហារទីតាំងជិត ១០០ នៅទូទាំងប្រទេសអ៊ីរ៉ង់ រួមទាំងគោលដៅនៅទីក្រុងតេអេរ៉ង់ ណាតាន់ ខុនដាប និងខូរ៉ាម៉ាបាដ ផងដែរ។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា មានអ្នកស្លាប់និងរបួសជាច្រើននាក់រួមមានស្ត្រី និងកុមារនៅក្នុងតំបន់លំនៅដ្ឋានមួយកន្លែង នៅក្នុងទីក្រុងតេអេរ៉ង់។
យោធាអ៊ីស្រាអែលបានអះអាងថា ប្រតិបត្តិការនេះចាំបាច់ ដើម្បីរារាំងអ៊ីរ៉ង់មិនឱ្យបង្កើតគ្រាប់បែកនុយក្លេអ៊ែរ។ ទោះបីជាយ៉ាងណាក៏ដោយ អ៊ីរ៉ង់បានបដិសេធម្តងហើយម្តងទៀត ក្នុងការស្វែងរកអាវុធបែបនេះ ខណៈដែលអ៊ីស្រាអែល មិនផ្តល់ព័ត៌មានភ្លាមៗបន្ទាប់ការវាយប្រហាររបស់អ៊ីរ៉ង់ កាលពីយប់មិញនៅឡើយទេ៕
ប្រែសម្រួល ឈូក បូរ៉ា
