ឧត្តមសេនីយ៍ ដែលជាប្រមុខចារកម្ម នៃកងឆ្មាំបដិវត្តន៍ឥស្លាម វរជនរបស់អ៊ីរ៉ង់ និងមន្ត្រីចារកម្មពីរនាក់ទៀត បានស្លាប់ នៅក្នុងការវាយប្រហារ របស់អ៊ីសា្រអែល

បរទេស៖ ប្រមុខចារកម្មនៃកងឆ្មាំបដិវត្តន៍ឥស្លាមវរជនអ៊ីរ៉ង់ (IRGC) ត្រូវបានសម្លាប់នៅក្នុងការវាយប្រហារ របស់អ៊ីស្រាអែល។ ឧត្តមសេនីយទោ Mohammad Kazemi ប្រធានអង្គការស៊ើបការណ៍សម្ងាត់របស់ IRGC ត្រូវបានគេធ្វើឃាត រួមជាមួយនឹងមន្ត្រីចារកម្មពីរនាក់ទៀត គឺលោក Hassan Mohaghdeh និង Mohsen Bagheri, នេះបើតាមឆ្មាំបានបញ្ជាក់នៅក្នុងសេចក្តីថ្លែងការណ៍ មួយកាលពីល្ងាចថ្ងៃអាទិត្យ ។

យោងតាមសារព័ត៌មាន RT ចេញផ្សាយ នៅថ្ងៃទី១៥ ខែមិថុនា ឆ្នាំ២០២៥ បានឱ្យដឹងថា IRGC បាននិយាយថា ខ្លួនបានឆ្លើយតបដោយការ បាញ់មីស៊ីលទៅលើ “មជ្ឈមណ្ឌលស៊ើបការណ៍សម្ងាត់” របស់អ៊ីស្រាអែល ដែលជាផ្នែកមួយ នៃរលកទីបីនៃការបាញ់ផ្លោងដែលកំពុងបន្តរបស់ខ្លួន ដែលត្រូវបានគេហៅថា Operation True Promise III ។

ការសម្លាប់លោក Kazemi ត្រូវបានប្រកាសជាលើកដំបូង ដោយនាយករដ្ឋមន្ត្រីអ៊ីស្រាអែល Benjamin Netanyahu នៅក្នុងបទសម្ភាសន៍ជាមួយ Fox News កាលពីថ្ងៃអាទិត្យ។

អរិភាពរវាងអ៊ីស្រាអែល និងអ៊ីរ៉ង់ បានផ្ទុះឡើងនៅព្រឹកថ្ងៃសុក្រ នៅពេលដែលយន្តហោះចម្បាំងរបស់អ៊ីស្រាអែល បានទម្លាក់គ្រាប់បែកលើទីតាំងយោធា និងនុយក្លេអ៊ែរនៅទូទាំងប្រទេស អ៊ីរ៉ង់ នៅក្នុងអ្វីដែលនាយករដ្ឋមន្ត្រីអ៊ីស្រាអែល Benjamin Netanyahu បានពណ៌នាថា ជាប្រតិបត្តិការមួយដើម្បីការពារ សាធារណរដ្ឋអ៊ីស្លាមពីការទទួល បានអាវុធនុយក្លេអ៊ែរ។ ទីក្រុងតេអេរ៉ង់បានឆ្លើយតបជាមួយនឹងការបាញ់មីស៊ីល ដែលមួយចំនួនបានវាយប្រហារ តំបន់លំនៅដ្ឋានក្នុងទីក្រុង Tel Aviv និង Bat Yam ៕
ប្រែសម្រួលៈ ណៃ តុលា