បរទេស៖ ភ្នំភ្លើង Lewotobi Laki Laki របស់ប្រទេសឥណ្ឌូនេស៊ី បានផ្ទុះឡើងជាមួយ នឹងការព្រុសផេះដ៏ធំ និងផ្សែងហុយនៅថ្ងៃពុធនេះ ដោយបានបង្ខំឱ្យមានការជម្លៀសអ្នកភូមិ និងការលុបចោលជើងហោះហើរ រួមទាំងទៅ និងមកពីរមណីយដ្ឋានកោះបាលី។
យោងតាមសារព័ត៌មាន AP ចេញផ្សាយនៅថ្ងៃទី១៨ ខែមិថុនា ឆ្នាំ២០២៥ បានឱ្យដឹងថា ការផ្ទុះជាច្រើនបានបញ្ជូនផេះដែលមានកំពស់រហូតដល់ ៥.០០០ ម៉ែត្រ ទៅលើមេឃកាលពីល្ងាចថ្ងៃអង្គារ និងដល់រសៀលថ្ងៃពុធ។ ការផ្ទុះមួយនៅរសៀលថ្ងៃអង្គារបានបង្កឱ្យមានពពកពណ៌ប្រផេះក្រាស់កម្ពស់ ១០.០០០ ម៉ែត្រ ទៅលើមេឃដែលបានពង្រីកទៅជាពពកផេះរាងផ្សិតដែលអាចមើលឃើញពីចម្ងាយរហូតដល់ ១៥០គីឡូម៉ែត្រ ។
ការជូនដំណឹងអំពីការផ្ទុះត្រូវបានលើកឡើង កាលពីថ្ងៃអង្គារដល់កម្រិតខ្ពស់បំផុត ហើយតំបន់គ្រោះថ្នាក់ ដែលមនុស្សត្រូវបានណែនាំឱ្យចាកចេញ ត្រូវបានពង្រីកដល់ ៨ គីឡូម៉ែត្រ ពីរណ្ដៅភ្នំភ្លើង។
ក្រុមមន្រ្តីក៏បានជម្លៀសចេញ ពីប៉ុស្តិ៍ត្រួតពិនិត្យភ្នំ Lewotobi Laki Laki ចម្ងាយ ៧ គីឡូម៉ែត្រ ពីរណ្ដៅភ្នំភ្លើង ដើម្បីជៀសវាងការធ្លាក់ក្រួស ដែលបញ្ចេញនៅក្នុងការផ្ទុះនេះ ។ គ្មានអ្នកស្លាប់ត្រូវបានគេរាយការណ៍ឡើយ៕
ប្រែសម្រួលៈ ណៃ តុលា
