បរទេស ៖ រដ្ឋមន្ត្រីការពារជាតិអ៊ីស្រាអែល Israel Katz បាននិយាយ កាលពីថ្ងៃព្រហស្បតិ៍ថា មេដឹកនាំកំពូលរបស់អ៊ីរ៉ង់ លោក Ali Khamenei “មិនអាចត្រូវបានអនុញ្ញាតឱ្យមានទៀតទេ” ។ ចំណែករបាយការណ៍ប្រព័ន្ធផ្សព្វផ្សាយមុនៗ បានលើកឡើងថា ប្រធានាធិបតីអាមេរិក Donald Trump បានរារាំងផែនការ របស់អ៊ីស្រាអែល ដើម្បីធ្វើឃាតមេដឹកនាំកំពូល របស់អ៊ីរ៉ង់ ។
យោងតាមសារព័ត៌មាន RT ចេញផ្សាយ នៅថ្ងៃទី១៩ ខែមិថុនា ឆ្នាំ២០២៥ បានឱ្យដឹងថា អ៊ីស្រាអែល បានបើកការវាយប្រហារ តាមអាកាសកាលពីថ្ងៃសុក្រសប្តាហ៍មុនសំដៅ ទៅលើទីតាំងនុយក្លេអ៊ែរអ៊ីរ៉ង់ និងបានធ្វើការសម្លាប់មន្ត្រីយោធាជាន់ខ្ពស់ជាគោលដៅ។ ការវាយប្រហារនេះបានជំរុញឱ្យមានការឆ្លើយតបរបស់អ៊ីរ៉ង់ ហើយប្រទេសទាំងពីរបានប៉ះពាល់គ្នា ចាប់តាំងពីពេលនោះមក។
លោក Katz បានធ្វើសេចក្តីថ្លែងការណ៍ បន្ទាប់ពីការវាយប្រហារដោយមីស៊ីល ដែលត្រូវបានគេរាយការណ៍ថា បានធ្វើឱ្យខូចខាតយ៉ាងធ្ងន់ធ្ងរដល់មន្ទីរពេទ្យ Soroka ក្នុងទីក្រុង Be’er Sheva ដែលជាទីក្រុងសំខាន់មួយនៅភាគខាងត្បូង ប្រទេសអ៊ីស្រាអែល។ លោក Shlomi Codish អគ្គនាយកមន្ទីរពេទ្យបាននិយាយថា គ្រាប់មីស៊ីលបានវាយប្រហារអគារចាស់មួយដែលត្រូវបានជម្លៀសចេញ។
លោក Katz បានអះអាងថា មេដឹកនាំកំពូលអ៊ីរ៉ង់ លោក Khamenei កំពុងបញ្ជាឲ្យមានការវាយប្រហារលើមន្ទីរពេទ្យដោយផ្ទាល់ ដែលលោកបានអះអាងថា ជាការត្រឹមត្រូវដែលអំពាវនាវឱ្យការសម្លាប់មេដឹកនាំអ៊ីរ៉ង់។ គាត់ក៏បានចោទលោក Khamenei ថាកំពុងស្វែងរកការបំផ្លិចបំផ្លាញរបស់អ៊ីស្រាអែលផងដែរ។
របាយការណ៍ពីបណ្តាញលោកខាងលិច ជាច្រើនកាលពីសប្តាហ៍ មុនបាននិយាយថា អ៊ីស្រាអែលបានពិគ្រោះជាមួយ សហរដ្ឋអាមេរិកអំពីផែនការធ្វើឃាត លោក Khamenei មុនពេលមានការកើនឡើងភាពតានតឹងចុងក្រោយនេះ។ យោងតាម សារព័ត៌មាន Axios គឺ លោក Trump បានច្រានចោលគំនិតនេះ ដោយមន្ត្រីអាមេរិក បានប្រាប់អ៊ីស្រាអែលថា “ប្រជាជនអ៊ីរ៉ង់មិនបានសម្លាប់ជនជាតិអាមេរិកម្នាក់ទេ ហើយការពិភាក្សាអំពីការ សម្លាប់មេដឹកនាំ នយោបាយមិនគួរមាននៅលើតុនោះទេ៕
ប្រែសម្រួលៈ ណៃ តុលា
