ការ៉ាកាស ៖ សម្ព័ន្ធ Bolivarian សម្រាប់ប្រជាជន នៃសន្ធិសញ្ញាពាណិជ្ជកម្មអាមេរិក និងប្រជាជនរបស់យើង (ALBA-TCP) កាលពីថ្ងៃអង្គារ បានថ្កោលទោសយ៉ាងខ្លាំង ចំពោះគោលនយោបាយ របស់សហរដ្ឋអាមេរិក ក្នុងការពង្រឹងការឈ្លានពានផ្នែកសេដ្ឋកិច្ច និងការទប់ស្កាត់ ប្រឆាំងនឹងគុយ បា។
នៅក្នុងសេចក្តីថ្លែងការណ៍មួយ ប្លុកនេះបានថ្កោលទោសការសម្រេចចិត្ត របស់ទីក្រុងវ៉ាស៊ីនតោនក្នុងការធ្វើឱ្យសកម្មឡើងវិញ និងធ្វើបច្ចុប្បន្នភាព អនុស្សារណៈលេខ ៥ របស់រដ្ឋបាលប្រធានាធិបតីលោក ដូណាល់ ត្រាំ ដែលពង្រឹងការរារាំង របស់សហរដ្ឋអាមេរិកប្រឆាំងនឹងគុយបា នេះបើយោងតាមការ ចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។
ប្លុកបានឲ្យដឹងថា ការសម្រេចចិត្តនេះ បង្ហាញពីការព្យាយាមកាន់តែខ្លាំងរបស់សហរដ្ឋអាមេរិកក្នុងការអនុវត្តការផ្លាស់ប្តូររបប និងរំខានដល់វិស័យសំខាន់ៗ របស់ប្រទេសគុយបា រួមទាំងទេសចរណ៍ ការថែទាំសុខភាព ការធ្វើចំណាកស្រុក ការផ្លាស់ប្តូរវប្បធម៌ និងការសិក្សា និងការទទួលបានបច្ចេកវិទ្យា។
គោលបំណងពិតប្រាកដរបស់រដ្ឋាភិបាលអាមេរិក គឺដើម្បីគ្រប់គ្រង ប្រទេសគុយបា និងគ្រប់គ្រងអនាគតរបស់ខ្លួន ដោយបានរំលឹកឡើងវិញ នូវសាមគ្គីភាពដែលមិនផ្លាស់ប្តូររបស់ខ្លួន ជាមួយប្រជាជន និងរដ្ឋាភិបាលគុយបា ក្នុងការការពារអធិបតេយ្យភាព សេរីភាព និងការសម្រេចចិត្តដោយខ្លួនឯង ។
រដ្ឋជាសមាជិកក៏បានរំលឹកឡើងវិញ នូវការប្តេជ្ញាចិត្តរបស់ពួកគេចំពោះសន្តិភាព សន្តិសុខ ការទូត ការមិនជ្រៀតជ្រែក និងសិទ្ធិក្នុងការសម្រេចចិត្ត ដោយខ្លួនឯង ។
គួរបញ្ជាក់ថា ALBA-TCP ដែលរួមមាន Antigua និង Barbuda, Bolivia, Cuba, Dominica, Grenada, Nicaragua, Saint Kitts and Nevis, Saint Vincent and the Grenadines, Saint Lucia និង Venezuela គឺជាអង្គការអន្តររដ្ឋាភិបាលដែលមានគោលបំណងធ្វើសមាហរណកម្មសង្គម នយោបាយ និងសេដ្ឋកិច្ចនៃប្រទេសអាមេរិកឡាទីន និងការាបៀន៕
ប្រែសម្រួល ឈូក បូរ៉ា
