ជប៉ុន រក្សាភាពស្ងៀមស្ងាត់លើ ការគំរាមកំហែងពន្ធរបស់លោក ត្រាំ ដោយប្តេជ្ញាធ្វើកិច្ចចរចាពាណិជ្ជកម្ម ដោយស្មោះត្រង់

តូក្យូ៖ រដ្ឋាភិបាលជប៉ុន បានបដិសេធមិនធ្វើអត្ថាធិប្បាយលើការ គំរាមកំហែងរបស់ប្រធានាធិបតីអាមេរិកលោក ដូណាល់ ត្រាំ ក្នុងការដាក់ពន្ធកាន់តែខ្ពស់លើផលិតផលជប៉ុន ដោយប្ដេជ្ញាថា ខ្លួននឹងបន្តកិច្ចពិភាក្សាទ្វេភាគី “ដោយស្មោះស្រង់” ។ ថ្លែងនៅក្នុងសន្និសីទសារព័ត៌មានមួយ អនុប្រធានខុទ្ទកាល័យលោក Kazuhiko Aoki បានឲ្យដឹងថា ប្រទេសជប៉ុនស្វែងរកកិច្ចព្រមព្រៀង ដែលមានអត្ថប្រយោជន៍ទៅវិញទៅមកជាមួយសហរដ្ឋអាមេរិកតាមរយៈការចរចាដែលកំពុងបន្ត។

លោក ត្រាំ កាលពីថ្ងៃអង្គារបានគំរាមដំឡើងពន្ធ លើប្រទេសជប៉ុនដល់ ៣០ ភាគរយឬ ៣៥ ភាគរយដោយបង្កើនអត្រាមុនពេលកាលកំណត់នៃការយកពន្ធទៅវិញទៅមករយៈពេល 90 ថ្ងៃពីពន្ធរបស់លោកដែលផុតកំណត់នៅថ្ងៃទី៩ ខែកក្កដា។ ការអត្ថាធិប្បាយរបស់លោកបានកើតឡើងខណៈការចរចាថ្នាក់រដ្ឋមន្ត្រីរវាងប្រទេសទាំងពីរ រហូតមកដល់ពេលនេះមិនបានសម្រេចនូវកិច្ចព្រមព្រៀងមួយ។ លោក ត្រាំ ក៏បានសម្តែងការខកចិត្តចំពោះការនាំចេញរថយន្ត និងអង្កររបស់សហរដ្ឋអាមេរិក ទៅកាន់ប្រទេសជប៉ុនផងដែរ។

លោក Aoki បានលើកឡើងថា “យើងដឹងពីអ្វីដែលប្រធានាធិបតី ត្រាំ បានលើកឡើង ប៉ុន្តែយើងមិនធ្វើអត្ថាធិប្បាយលើរាល់ការកត់សម្គាល់ដែលធ្វើឡើងដោយ មន្ត្រីរដ្ឋាភិបាលសហរដ្ឋអាមេរិកនោះទេ” ។ លោកក៏បានឲ្យដឹងផងដែរថា “យើងមានបំណងជំរុញកិច្ចចរចាទ្វេភាគីក្នុងលក្ខណៈស្មោះត្រង់ និងស្មោះត្រង់ឆ្ពោះទៅរកការសម្រេចបាននូវកិច្ចព្រមព្រៀង ដែលនឹងផ្តល់ផលប្រយោជន៍ទាំងជប៉ុន និងសហរដ្ឋអាមេរិក”។

សហរដ្ឋអាមេរិកបានដាក់ពន្ធលើ ផលិតផលជាច្រើនប្រភេទ ចាប់ពីរថយន្ត និងគ្រឿងបន្លាស់រថយន្ត រហូតដល់ដែក និងអាលុយមីញ៉ូម។ ទោះបីជាមានការផ្អាករយៈពេល ៣ ខែលើពន្ធទៅវិញទៅមកក៏ដោយ កាតព្វកិច្ចមូលដ្ឋានចំនួន ១០ ភាគរយគឺរួចរាល់ហើយ។ ក្នុងចំណោមពន្ធខ្ពស់ដែលបាន ដាក់លើការនាំចេញដែលជាប់ព្រំដែនសហរដ្ឋអាមេរិក ពន្ធនាំចូល ២៥ ភាគរយលើរថយន្តគឺជាផលប៉ះពាល់ យ៉ាងធ្ងន់ធ្ងរដល់ក្រុមហ៊ុន Toyota Motor Corp. និង Honda Motor Co ដែលបានផ្តល់សារៈសំខាន់នៃទីផ្សារសហរដ្ឋអាមេរិក។

លោក ត្រាំ បានងាកទៅរកបញ្ហាពន្ធគយ ដើម្បីកាត់បន្ថយឱនភាពពាណិជ្ជកម្មដ៏ធំ របស់ប្រទេសលោកជាមួយនឹងប្រទេសជប៉ុន។ នៅពេលដែលនាយករដ្ឋមន្ត្រីជប៉ុនលោក Shigeru Ishiba បានជួបជាមួយមេដឹកនាំសហរដ្ឋអាមេរិកនៅពាក់កណ្តាលខែមិថុនា ពួកគេបានបរាជ័យក្នុងការធ្វើកិច្ចព្រមព្រៀងមួយ ដោយសារតែភាពខុសគ្នាជាបន្តបន្ទាប់៕

ប្រែសម្រួល ឈូក បូរ៉ា