បរទេស ៖ រដ្ឋមន្ត្រីដឹកជញ្ជូនរុស្ស៊ី លោក Roman Starovoit ត្រូវបានរកឃើញស្លាប់ ប៉ុន្មានម៉ោង បន្ទាប់ពីត្រូវបានបណ្តេញចេញ ពីតំណែងដោយប្រធានាធិបតី Vladimir Putin ។ គណៈកម្មាធិការស៊ើបអង្កេតរបស់រុស្ស៊ី បានបញ្ជាក់កាលពីថ្ងៃចន្ទថា សាកសពរបស់លោក Starovoit ត្រូវបានរកឃើញនៅក្នុង រថយន្តឯកជនមួយក្នុងតំបន់ Moscow ជាមួយនឹងរបួសដោយគ្រាប់កាំភ្លើង។ អ្នកនាំពាក្យ Svetlana Petrenko បាននិយាយថា “កំណែចម្បងដែលកំពុងពិចារណា គឺជាការធ្វើអត្តឃាត” ។
យោងតាមសារព័ត៌មាន RT ចេញផ្សាយនៅថ្ងៃទី៧ ខែកក្កដា ឆ្នាំ២០២៥ បានឱ្យដឹងថា ប្រព័ន្ធផ្សព្វផ្សាយបានរាយការណ៍ថា សាកសពរបស់លោក Starovoit ត្រូវបានគេរកឃើញនៅក្នុងរថយន្ត Tesla ក្បែរឧទ្យាន Malevich ជាយក្រុងមូស្គូ ប្រហែលម៉ោង ៣ រសៀលម៉ោងក្នុងស្រុក។ កាំភ្លើងខ្លី Marakov ត្រូវបានគេរាយការណ៍ថាបានរកឃើញនៅក្បែរសាកសព។
មុនពេលក្លាយជារដ្ឋមន្ត្រី ដឹកជញ្ជូន លោក Starovoit បានបម្រើការជាអភិបាលនៃតំបន់ Kursk ។ ប្រភព RT បានឲ្យដឹងថា ការស៊ើបអង្កេតប្រឆាំង នឹង គាត់ត្រូវបានកំណត់ដើម្បីចាប់ផ្តើមសម្រាប់ការចោទប្រកាន់ថា លោកបានកេងបន្លំមូលនិធិ សម្រាប់ការសាងសង់ការពារនៅក្នុងតំបន់ ចាប់ពីឆ្នាំ ២០២២ ដល់ឆ្នាំ ២០២៤ នៅពេលដែលគាត់ទទួលបន្ទុក ។ ប្រភពបានអះអាងថា លោក Starovoit អាចត្រូវបានឃុំខ្លួនដោយអ្នកស៊ើបអង្កេតនៅល្ងាចថ្ងៃចន្ទ ហើយនាំមកសាកសួរ ដោយប្រឈម នឹងការចោទប្រកាន់ពីបទលួចលុយរាប់លានរូប្ល (លុយរុស្ស៊ី)។
អ៊ុយក្រែនបានបើកការលុកលុយទ្រង់ទ្រាយធំចូលទៅក្នុងតំបន់ Kursk កាលពីខែសីហាមុន ដែលជាអ្វីដែលក្រុមមន្ត្រីក្រុងគៀវ បាននិយាយថាជាការវាយប្រហារដល់រុស្ស៊ី។ ទោះជាយ៉ាងណាក៏ដោយ កងកម្លាំងរុស្ស៊ី បានបង្វែរជំនោរយ៉ាងឆាប់រហ័ស ហើយកងទ័ពអ៊ុយក្រែន ត្រូវបានបណ្តេញចេញទាំងស្រុង នៅចុងខែមេសា៕
ប្រែសម្រួលៈ ណៃ តុលា
