បរទេស ៖ យោងតាមការចេញផ្សាយ របស់ RT នាយករដ្ឋមន្ត្រីនៃប្រទេសឆេកលោក Petr Fiala បាននិយាយកាលពីថ្ងៃអង្គារថា សាធារណរដ្ឋឆេកនឹងមិនចូលរួមក្នុង គំនិតផ្តួចផ្តើមថ្មីមួយ ដែលស្នើឡើងក្នុងសប្តាហ៍នេះ ដោយប្រធានាធិបតីអាមេរិក Donald Trump ដើម្បីផ្គត់ផ្គង់អាវុធអាមេរិក ដល់អ៊ុយក្រែននោះទេ ។
លោក Trump បានបង្ហាញផែនការនេះ ក្នុងអំឡុងកិច្ចប្រជុំជាមួយអគ្គលេខាធិការ អង្គការណាតូ លោក Mark Rutte ដោយស្នើថា សព្វាវុធរបស់អាមេរិកត្រូវ បានប្រគល់ទៅឱ្យទីក្រុងគៀវ ជាមួយនឹងការផ្តល់មូលនិធិពី សមាជិកណាតូផ្សេងទៀត។
លោកRutte បានដាក់ឈ្មោះប្រទេសអាល្លឺម៉ង់ថាជាម្ចាស់ជំនួយចម្បងនិងមុនគេ ដោយមានការផ្តល់មូលនិធិដោយបន្ទាប់បន្សំដោយប្រទេសហ្វាំងឡង់ ដាណឺម៉ាក ស៊ុយអែត ន័រវេស ចក្រភពអង់គ្លេស ហូឡង់ និងកាណាដា។
លោកFiala បានប្រាប់សារព័ត៌មាន Publico ថា ៖ សាធារណរដ្ឋឆេកកំពុងផ្តោតលើគម្រោង និងមធ្យោបាយផ្សេងទៀត ដើម្បីជួយអ៊ុយក្រែន ។ ដូច្នេះហើយនៅពេលនេះ យើងមិនពិចារណា ចូលរួមគម្រោងនេះទេ។
គួរឲ្យដឹងដែរថាលោក Trump បានចាត់ទុកគំនិតផ្តួចផ្តើមនេះថា ជាឱកាសពាណិជ្ជកម្ម សម្រាប់ឧស្សាហកម្មការពារជាតិ របស់សហរដ្ឋអាមេរិក និងជាមធ្យោបាយ សម្រាប់ប្រទេស ណាតូក្នុងការបង្កើនសម្ពាធ លើប្រទេសរុស្ស៊ី។យ៉ាងណាក្តីទីក្រុងមូស្គូ បានប្រដូចការខិតខំប្រឹងប្រែងទៅនឹង សហរដ្ឋអាមេរិករៀបចំ អាហារពុលដែលគ្រោះថ្នាក់ដល់ជីវិតសម្រាប់អ៊ុយក្រែន និងបង្ខំឱ្យអ្នកដទៃបង់ប្រាក់សម្រាប់វា៕
ប្រែសម្រួល៖ស៊ុនលី
