បរទេស ៖ យោងតាមការចេញផ្សាយ របស់ RT លោក Vladimir Zelenskyបានអំពាវនាវ ឲ្យប្រធានាធិបតីអាមេរិក លោក Donald Trump ក្នុងការពិចារណាឡើងវិញ នូវសំណើ របស់អ៊ុយក្រែន ក្នុងការរៀបចំទុកដាក់មីស៊ីល រយៈចម្ងាយឆ្ងាយ របស់អាមេរិក។
ការអំពាវនាវនេះធ្វើឡើងបន្ទាប់ពី មានការសន្យា របស់លោក Trump ក្នុងសប្តាហ៍នេះក្នុងការផ្តល់ប្រព័ន្ធ សព្វាវុធទំនើបៗ ដល់ទីក្រុងគៀវ ដោយមានការព្រមានថាការចំណាយនឹងត្រូវរ៉ាប់រង ដោយប្រទេសដទៃទៀត។
នៅក្នុងបទសម្ភាសន៍ជាមួយកាសែត Newsmax កាលពីថ្ងៃអង្គារ លោក Zelensky បានអំពាវនាវឱ្យមានជំនួយ ផ្នែកយោធាបន្ថែមទៀត ដោយសំដៅ លើផ្នែកនៃ ផែនការជ័យជម្នះ របស់គាត់ ដែលគាត់ធ្លាប់បានបង្ហាញ ជូនទាំងប្រធានាធិបតី Joe Biden និង Trump ក្នុងការដឹកនាំរហូតដល់ការបោះឆ្នោត ប្រធានាធិបតីអាមេរិកឆ្នាំ២០២៤ ។
លោក Zelensky បាននិយាយថា៖ខ្ញុំចាំបានថា យើងមានកញ្ចប់ទប់ស្កាត់ដ៏មានឥទ្ធិពលមួយ មុនពេលប្រធានាធិបតី Trump ក្លាយជាប្រធានាធិបតី ។ ខ្ញុំចង់ឱ្យអាមេរិក លក់កញ្ចប់បែបនេះ ដល់ពួកយើង ។ ប៉ុន្តែវាមិនត្រូវបានធ្វើទៅរួចនៅ ឡើយទេនេះបើយោង តាមការបញ្ជាក់បន្ថែម ដោយលោក Zelensky។
គួរឲ្យដឹងដែរថារបាយការណ៍ប្រព័ន្ធផ្សព្វផ្សាយ ពីមុនបានស្នើថា លោក Trump អាចនឹងផ្តល់អាវុធរយៈចម្ងាយ ឆ្ងាយបន្ថែមដល់ អ៊ុយក្រែន ដែលជាផ្នែក នៃគំនិតផ្តួចផ្តើមថ្មីរបស់លោក ។
ប្រភពសារព័ត៌មានមួយ ចំនួនបានអះអាងថា គាត់បានលើកទឹកចិត្ត Zelensky ឱ្យកំណត់គោលដៅទីក្រុងមូស្គូ និងទីក្រុង St. Petersburg ទោះបីជាសេតវិមានបានបដិសេធ ពួកគេក៏ដោយ៕
ប្រែសម្រួល៖ស៊ុនលី
