កៀវ៖ ប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី បានស្នើទៅសភាអ៊ុយក្រែន Verkhovna Rada ដើម្បីតែងតាំងអតីតនាយករដ្ឋមន្ត្រី លោក Denys Shmyhal ជារដ្ឋមន្ត្រីការពារជាតិថ្មី របស់ប្រទេស នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក ហ្សេឡិនស្គី បានឲ្យដឹងនៅក្នុងសារ បង្ហោះនៅលើបណ្ដាញ Telegram ថា “ថ្ងៃនេះខ្ញុំបានចុះហត្ថលេខាលើឯកសារ រួចហើយទៅកាន់សភា Verkhovna Rada នៃប្រទេសអ៊ុយក្រែន ទាក់ទងនឹងលោក Denys Shmyhal ជារដ្ឋមន្ត្រីការពារជាតិថ្មី” ។ នៅក្នុងនោះដែរលោក ហ្សេឡិនស្គី ក៏បានប្រកាសថាលោក Herman Smetanin រដ្ឋមន្ត្រីក្រសួងឧស្សាហកម្មយុទ្ធសាស្ត្រ នឹងដឹកនាំក្រុមហ៊ុនការពារជាតិ Ukroboronprom របស់ប្រទេស។
លោក Shmyhal បានឲ្យដឹង កាលពីថ្ងៃអង្គារថា លោកបានដាក់លិខិតលាលែងពីតំណែង ដែលជាផ្នែកមួយ នៃការរុះរើរដ្ឋាភិបាលរបស់ប្រទេស ។ នៅព្រឹកថ្ងៃដដែល សភាបានអនុម័តលើការលាលែង ពីតំណែងរបស់លោក Shmyhal ដែលបង្កឱ្យមានការលាលែង ពីតំណែងរបស់រដ្ឋាភិបាលទាំងមូលស្របតាមច្បាប់របស់អ៊ុយក្រែន។
គួរបញ្ជាក់ថា គណៈរដ្ឋមន្ត្រី ដែលចាកចេញនឹងបន្តអនុវត្តភារកិច្ច របស់ខ្លួនរហូតដល់រដ្ឋាភិបាលថ្មី ត្រូវបានបង្កើតឡើង៕
ប្រែសម្រួល ឈូក បូរ៉ា
