បរទេស ៖ កាលពីថ្ងៃច័ន្ទ គឺតម្លៃប្រេងបានធ្លាក់ចុះ ខណៈដែលពាណិជ្ជករ បានសម្លឹងមើលផលប៉ះពាល់ នៃទណ្ឌកម្មថ្មីរបស់អឺរ៉ុប លើការផ្គត់ផ្គង់ប្រេងរបស់រុស្ស៊ី ការកើនឡើងទិន្នផលពីអ្នកផលិតនៅមជ្ឈិមបូព៌ា និងការព្រួយបារម្ភអំពីទស្សនវិស័យប្រេងឥន្ធនៈ ខណៈដែលពន្ធគយមានទម្ងន់លើកំណើន សេដ្ឋកិច្ចពិភពលោក។
យោងតាមគេហទំព័រ Business Standard បានឱ្យដឹងនៅថ្ងៃទី២១ ខែកក្កដា ឆ្នាំ២០២៥ថា តម្លៃប្រេងឆៅ Brent បានកើនឡើង ៥ សេន គឺដល់ ៦៩,៣៣ ដុល្លារក្នុងមួយបារ៉ែល បន្ទាប់ពីបានធ្លាក់ចុះ ០,៣៥ភាគរយ កាលពីថ្ងៃសុក្រ។ ប្រេងឆៅរបស់អាមេរិក West Texas Intermediate មានតម្លៃ ៦៧,៣៦ ដុល្លារក្នុងមួយបារ៉ែល កើនឡើង ២ សេន បន្ទាប់ពីការធ្លាក់ចុះ ០,៣០ភាគរយ នៅក្នុងវគ្គមុន។
សហភាពអឺរ៉ុប បានអនុម័តកាលពីថ្ងៃសុក្រ នូវកញ្ចប់ទណ្ឌកម្មលើកទី ១៨ ប្រឆាំងនឹងរុស្ស៊ីជុំវិញជម្លោះក្នុងប្រទេសអ៊ុយក្រែន ដែលបានកំណត់ គោលដៅផងដែរ ទៅលើក្រុមហ៊ុន Nayara Energy របស់ឥណ្ឌា ដែលជាអ្នកនាំចេញផលិតផលប្រេងចម្រាញ់ពីប្រេងឆៅរបស់រុស្ស៊ី។
អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃសុក្រថា រុស្ស៊ីបានបង្កើតភាពស៊ាំ ដែលជាក់លាក់មួយ ចំពោះទណ្ឌកម្មរបស់លោកខាងលិច ។
Rosneft ដែលជាក្រុមហ៊ុនផលិតប្រេងដ៏ធំបំផុត របស់រុស្ស៊ីដែលមានភាគហ៊ុននៅ Nayara កាលពីថ្ងៃអាទិត្យបានរិះគន់ការដាក់ទណ្ឌកម្មថា មិនសមហេតុផល និងខុសច្បាប់ ដោយនិយាយថា ការរឹតបន្តឹងនេះបានគំរាមកំហែងដោយផ្ទាល់ដល់សន្តិសុខថាមពលរបស់ប្រទេសឥណ្ឌា។
ចំណែកអ្នកនាំពាក្យក្រសួងការបរទេសអ៊ីរ៉ង់ បាននិយាយកាលពីថ្ងៃចន្ទថា ប្រទេសអ៊ីរ៉ង់ ដែលជាប្រទេសផលិតប្រេងដែលត្រូវរងទណ្ឌកម្ម នឹងត្រូវរៀបចំកិច្ចចរចា នុយក្លេអ៊ែរនៅទីក្រុងអ៊ីស្តង់ប៊ុលជាមួយចក្រភពអង់គ្លេស បារាំង និងអាល្លឺម៉ង់នៅថ្ងៃសុក្រ។ ជំនួបចរចានេះ គឺបន្ទាប់ពីមានការព្រមាន ដោយប្រទេសអឺរ៉ុបទាំងបីថា ការបរាជ័យក្នុងការបន្តការចរចានឹងនាំ ឱ្យទណ្ឌកម្មអន្តរជាតិត្រូវបានដាក់ឡើងវិញលើអ៊ីរ៉ង់៕
