បរទេស៖ ប្រជាជនក្នុងតំបន់ និងអ្នកទេសចរណ៍ ក្នុងប្រទេសជប៉ុន ត្រូវបានគេណែនាំឱ្យរក្សាការ ប្រុងប្រយ័ត្ននៅថ្ងៃព្រហស្បតិ៍ បន្ទាប់ពីរលកយក្សស៊ូណាមិដែលបង្កឡើង ដោយការរញ្ជួយដីកម្រិត 8.8 នៅឧបទ្វីប Kamchatka របស់ប្រទេសរុស្ស៊ី បានឈានមកដល់ឆ្នេរសមុទ្រប៉ាស៊ីហ្វិក។
យោងតាមសារព័ត៌មាន Kyodo News ចេញផ្សាយ នៅថ្ងៃទី៣១ ខែកក្កដា ឆ្នាំ២០២៥ បានឱ្យដឹងថា ខណៈពេលដែលការ ព្រមានទាំងអស់ត្រូវបានបន្ទាប នៅយប់ថ្ងៃពុធ ក៏ការព្រមានកម្រិតដដែល នៅតែមានសម្រាប់តំបន់ជាច្រើន ដោយទីភ្នាក់ងារឧតុនិយមជប៉ុនបានវាយតម្លៃថាតើត្រូវដកចេញឬអត់។ នៅទីតាំងជាង ១០, រលកយក្សស៊ូណាមិមានកម្ពស់ ៧០ សង់ទីម៉ែត្រ។
JR Hokkaido ដែលគ្របដណ្តប់ផ្នែកខ្លះ នៃកោះសំខាន់ភាគខាងជើង របស់ប្រទេសជប៉ុន បានផ្អាកសេវាកម្ម ពីរថភ្លើងដំបូងនៅលើផ្នែកខ្លះ ខណៈដែលអ្នកស្រុកខ្លះត្រូវបានបង្ខំឱ្យចំណាយ ពេលយប់នៅមជ្ឈមណ្ឌលជម្លៀស។
បន្ទាប់ពីការរញ្ជួយដីបានវាយប្រហារ នៅព្រឹកថ្ងៃពុធ ការព្រមានអំពីរលកយក្សស៊ូណាមិ គឺត្រូវបានចេញសម្រាប់តំបន់ ឆ្នេរចាប់ពីកោះសំខាន់ភាគខាងជើងរបស់ប្រទេសជប៉ុន នៃកោះហុកកៃដូទៅកាន់ខេត្ត Wakayama នៅភាគខាងលិច។
មនុស្សរហូតដល់ ២ លាននាក់ត្រូវបានបញ្ជាឱ្យជម្លៀសចេញ ឬស្វែងរកទីតាំងសុវត្ថិភាពភ្លាមៗ ហើយកិច្ចការ គឺកាន់តែលំបាកនៅពេលដែលប្រទេសជប៉ុន កំពុងស្ថិតក្រោមសីតុណ្ហភាពរដូវក្តៅខ្លាំង៕
ប្រែសម្រួលៈ ណៃ តុលា
