បរទេស៖ យោងតាមការចេញផ្សាយរបស់ RT អ្នកនាំពាក្យក្រសួងការបរទេសឥណ្ឌា លោក Randhir Jaiswal បាននិយាយកាលពីថ្ងៃសុក្រថា ទំនាក់ទំនងឥណ្ឌា-អាមេរិកបានធ្វើឱ្យមានការផ្លាស់ប្តូរ និងបានជួបប្រទះបញ្ហាប្រឈមជាច្រើនមកហើយនាពេលកន្លងមក ប៉ុន្តែនឹងនៅតែបន្តដោយផ្អែកលើការគោរពគ្នាទៅវិញទៅមក។
ការអត្ថាធិប្បាយនេះ ធ្វើឡើងដើម្បីឆ្លើយតបនឹងសហរដ្ឋអាមេរិក ដែលបានដាក់ពន្ធ២៥ភាគរយ លើការនាំចូលពីប្រទេសឥណ្ឌា និងការគំរាមកំហែងរបស់លោក Donald Trump ក្នុងការបន្ថែមការពិន័យ និងលើសពីនេះ ដោយសារតែទំនាក់ទំនងពាណិជ្ជកម្ម និងការពារជាតិរបស់ទីក្រុង New Delhi ជាមួយទីក្រុងមូស្គូផង។
លោក Jaiswal បាននិយាយថា៖ប្រទេសឥណ្ឌា និងសហរដ្ឋអាមេរិកចែករំលែកភាពជាដៃគូយុទ្ធសាស្ត្រសកលដ៏ទូលំទូលាយមួយដែលបោះយុថ្កានៅក្នុងផលប្រយោជន៍រួម តម្លៃប្រជាធិបតេយ្យ ទំនាក់ទំនងរវាងប្រជាជននិងប្រជាជនដ៏រឹងមាំ។
លោកក៏បាននិយាយអំពីសក្តានុពលសម្រាប់ភាពជាដៃគូការពារជាតិជាមួយទីក្រុងវ៉ាស៊ីនតោនផងដែរ។ លោកបានមានប្រសាសន៍ថា៖យើងមានទំនាក់ទំនងការពារដ៏រឹងមាំជាមួយសហរដ្ឋអាមេរិកដែលបាននិងកំពុងពង្រឹងក្នុងរយៈពេលប៉ុន្មានឆ្នាំចុងក្រោយនេះ។
អ្នកនាំពាក្យរូបនេះក៏បាននិយាយដែរថាការសម្រេចចិត្តរបស់ឥណ្ឌាលើការទិញផ្នែកការពារជាតិពីរុស្សីត្រូវបានជំរុញដោយតម្រូវការសន្តិសុខជាតិ និងការពិចារណាជាយុទ្ធសាស្ត្រតែប៉ុណ្ណោះ ដោយបន្ថែមថាប្រភពថាមពលរបស់ប្រទេសនេះក៏ត្រឹមតែជារឿងចាំបាច់ដូចគ្នាប៉ុន្តែមិនមែនជាផ្នែកមួយនៃដៃគូជាយុទ្ធសាស្ត្រអ្វីនោះទេ៕
ប្រែសម្រួល៖ ស៊ុន លី
Recommended for you
