តើមានអ្វីកើតឡើង ប្រសិនបើឥណ្ឌា និងចិនឈប់ទិញប្រេងពីរុស្ស៊ី ដោយសារសម្ពាធពីអាមេរិក?

បរទេស៖ ប្រសិនបើលំហូរប្រេងរបស់រុស្ស៊ីត្រូវបានរំខាន ឥណ្ឌាអាចខាតបង់ ១១ ពាន់លានដុល្លារក្នុងមួយឆ្នាំ ចំណែក ទីក្រុងម៉ូស្គូនឹងប្រឈមមុខនឹងសម្ពាធថវិកាបន្ថែម ហើយអតិផរណាពិភពលោកនឹងកើនឡើង។

យោងតាមសារព័ត៌មាន VN EXPRESS ចេញផ្សាយនៅថ្ងៃទី៨ ខែសីហា ឆ្នាំ២០២៥ បានឱ្យដឹងថា កាលពីថ្ងៃទី៦ ខែសីហា ប្រធានាធិបតីអាមេរិកលោក Donald Trump បានចុះហត្ថលេខាលើបទបញ្ជាប្រតិបត្តិមួយ ដើម្បីបង្កើនពន្ធនាំចូលលើទំនិញពីឥណ្ឌាចំនួន 25% ដែលនាំឱ្យពន្ធសរុបដល់ 50% ដោយអាមេរិកលើកឡើងថា ឥណ្ឌាបន្តទិញប្រេងឆៅរបស់ប្រទេសរុស្សី។ នេះគឺជាអត្រាពន្ធខ្ពស់បំផុតដែលបានអនុវត្ត ចំពោះដៃគូពាណិជ្ជកម្មរបស់សហរដ្ឋអាមេរិក។ អត្រាពន្ធនឹងចូលជាធរមានចាប់ពីថ្ងៃទី ២៧ ខែសីហា។

នៅថ្ងៃដដែលនោះ លោក Donald Trump បាននិយាយថា លោកអាចនឹងប្រកាសដំឡើងពន្ធបន្ថែមលើប្រទេសចិន ដោយលើកឡើងពីហេតុផលស្រដៀងគ្នានេះ។ ទោះជាយ៉ាងណាក៏ដោយការសម្រេចចិត្ត ចុងក្រោយនឹងអាស្រ័យលើស្ថានភាព។ លោកបានពន្យល់ថា “ខ្ញុំមិនអាចនិយាយឱ្យប្រាកដបានទេ។ យើងបានធ្វើវាជាមួយប្រទេសឥណ្ឌា ហើយយើងនឹងធ្វើវាជាមួយប្រទេសមួយចំនួនទៀត។ មួយក្នុងចំណោមទាំងនោះ អាចជាប្រទេសចិន” ។

យោងតាមសារព័ត៌មាន CNBC នេះគឺជាសញ្ញាចុងក្រោយបង្អស់ដែលថា លោក Trump កំពុងធ្វើឱ្យបានល្អចំពោះការគំរាមកំហែងរបស់គាត់ ចំពោះប្រទេសណាមួយដែលទិញប្រេងពីរុស្ស៊ី។ គោលដៅ​គឺ​ដើម្បី​ដាក់​សម្ពាធ​លើ​រុស្ស៊ី​ឲ្យ​បញ្ចប់​សង្រ្គាម​នៅ​អ៊ុយក្រែន ព្រោះ​ការ​នាំចេញ​ថាមពល​បាន​រួម​ចំណែក​ យ៉ាង​ខ្លាំង​ដល់​ថវិកា​របស់​ទីក្រុង​ម៉ូស្គូ។

បន្ទាប់ពីសង្គ្រាមផ្ទុះឡើងនៅដើមឆ្នាំ ២០២២ ប្រេងរបស់រុស្ស៊ីត្រូវបានជៀសវាងដោយលោកខាងលិច ហើយការដាក់ទណ្ឌកម្មជាច្រើនត្រូវបានដាក់ចេញ។ ដូច្នេះ ឥណ្ឌា និងចិនបានក្លាយជាអ្នកទិញធំបំផុតនៃផលិតផលនេះជាបណ្តើរៗ។ DW បានដកស្រង់ទិន្នន័យដែលបង្ហាញថាក្នុងកំឡុងឆ្នាំ ២០២១-២០២៤ ការនាំចូលរបស់ឥណ្ឌាពីរុស្ស៊ីបានកើនឡើង ១៩ ដង ដល់ ១,៩លានបារ៉ែលក្នុងមួយថ្ងៃ។ ទន្ទឹមនឹងនោះ ចិនកើនឡើង ៥០% ដល់ ២,៤លានបារ៉ែលក្នុងមួយថ្ងៃ។

លោក Trump បាននិយាយថា ពន្ធថ្មីនឹងចូលជាធរមានក្នុងរយៈពេល ២១ ថ្ងៃ ដោយផ្តល់ពេលវេលាដល់រុស្ស៊ី និងឥណ្ឌា ដើម្បីចរចាជាមួយសហរដ្ឋអាមេរិក លើពន្ធនាំចូល។ លោក​ក៏​គ្រោង​នឹង​ប្រកាស​ដាក់​ទណ្ឌកម្ម​បន្ទាប់បន្សំ​លើ​សេដ្ឋកិច្ច​ផ្សេង​ទៀត ​ដែល​ធ្វើ​ពាណិជ្ជកម្ម​ប្រេង​ជាមួយ​រុស្ស៊ី។ សេតវិមាន​បាន​និយាយ​ថា​ ខ្លួន​នឹង​បញ្ចេញ​ព័ត៌មាន​លម្អិត​នៅ​ថ្ងៃ​ទី ៨ ខែ​សីហា។

អ្នកវិភាគនិយាយថា ប្រសិនបើចិន និងឥណ្ឌា ទិញប្រេងពីរុស្ស៊ី ផ្លាស់ប្តូរក្រោមសម្ពាធពីអាមេរិក នោះផលប៉ះពាល់នឹងមិនបញ្ឈប់ នៅត្រឹមបណ្តាប្រទេសទាំងនេះទេ ៕

ប្រែសម្រួលៈ ណៃ តុលា