បរទេស៖ កងទ័ពជើងទឹកថៃបានបាត់បង់នាយទាហានម្នាក់ដែលស្លាប់ក្នុងឧបទ្ទវហេតុពេលកំពុងរៀបចំសព្វាវុធនៅព្រំដែនកម្ពុជា-ថៃ។ គាត់ជាមន្ត្រីកងទ័ពជើងទឹក ដែលគាំទ្រកងកម្លាំងប្រយុទ្ធជើងគោក។
ទំព័រហ្វេសប៊ុក khaosod English បានឲ្យដឹងនៅថ្ងៃទី១០ ខែសីហានេះថា កាលពីថ្ងៃទី១០ ខែសីហា ឆ្នាំ ២០២៥ ឧត្តមនាវីទោ Parach Rattanaichaiphan អ្នកនាំពាក្យរងនៃកងទ័ពជើងទឹកថៃ បានបង្ហើបថា ជាការឆ្លើយតបនឹងសារ និងរូបភាពដែលផ្សព្វផ្សាយតាមប្រព័ន្ធអ៊ីនធឺណែត អំពីការស្លាប់របស់អនុសេនីយ៍ឯក Pattarawut Rattanawong ដោយសារឧបទ្ទវហេតុទាក់ទងនឹងអាវុធនៅព្រំដែនកម្ពុជា-ថៃ។
លោកបានបញ្ជាក់ថា លោកអនុសេនីយ៍ឯក Pattarawut Rattanawong បានស្លាប់ក្នុងពេលបំពេញមុខងារជានាយទាហានជើងទឹកជួយដល់កងកម្លាំងប្រយុទ្ធជើងគោកក្នុងប្រតិបត្តិការរួម។
ឧបទ្ទវហេតុនេះបានកើតឡើងនៅឯមូលដ្ឋានរបស់ពួកគេខណៈពេលដែលគាត់កំពុងពិនិត្យមើលការត្រៀមខ្លួននៃអាវុធ។ ក្រោយមកគាត់បានស្លាប់នៅមន្ទីរពេទ្យ។
ប្រែសម្រួល ណៃ តុលា
