ក្រុមហ៊ុនផលិតរថយន្តពិភពលោកចំនួន១៤ ខាតជិត ១២ ពាន់លានដុល្លារ ចាប់តាំងពីការចាប់ផ្តើមពន្ធពាណិជ្ជកម្មថ្មីរបស់លោក Donald Trump

បរទេស៖ ក្រុមហ៊ុនផលិតរថយន្តពិភពលោកចំនួន១៤ បានទទួលរងការខាតជិត ១២ ពាន់លានដុល្លារចាប់តាំងពីការចាប់ផ្តើម ពន្ធពាណិជ្ជកម្មថ្មីរបស់ប្រធានាធិបតីអាមេរិក Donald Trump ហើយត្រូវបានគេរំពឹងថា នឹងបាត់បង់កាន់តែច្រើននៅចុងឆ្នាំនេះ, នេះបើតាមកាសែត Wall Street Journal។

យោងតាមសារព័ត៌មាន RT ចេញផ្សាយកាលពីថ្ងៃទី៧ ខែសីហា ឆ្នាំ២០២៥ បានឱ្យដឹងថា លោក Trump បានប្រកាសពន្ធថ្មីនៅក្នុងខែមេសា ដោយផ្តោតលើប្រទេស និងដែនដីចំនួន ១៨៥។ ពន្ធគយ 10% ជាសកលលើយានជំនិះ និងគ្រឿងបន្លាស់ដែលនាំចូលទាំងអស់ ចូលជាធរមាននៅថ្ងៃទី ៥ ខែមេសា ។

យោងតាមការវិភាគរបស់កាសែត Wall Street Journal ដែលបានចេញផ្សាយកាលពីថ្ងៃព្រហស្បតិ៍ ក្រុមហ៊ុន Toyota បានខាតបង់ដ៏ធំបំផុត គឺប្រហែល ៣ ពាន់លានដុល្លារគិតតែក្នុងត្រីមាសទីពីរ ហើយរំពឹងថានឹងមានផលប៉ះពាល់ពន្ធសរុបចំនួន ៩,៥ ពាន់លានដុល្លារនៅចុងឆ្នាំសារពើពន្ធ ដែលបញ្ចប់ខែមីនា ឆ្នាំ២០២៦ ។

ក្រុមហ៊ុន Volkswagen ត្រូវបានគេរាយការណ៍ថា បានខាតបង់ចំនួន ១,៥ ពាន់លានដុល្លារ ខណៈដែលក្រុមហ៊ុន Ford និង General Motors បានរាយការណ៍ពីការខាតបង់លើសពី ១ ពាន់លានដុល្លារនៅក្នុងត្រីមាសទីពីរ។

ក្រុមហ៊ុន Tesla បានរងផលប៉ះពាល់តិចតួចបំផុត ក្នុងចំណោមក្រុមហ៊ុនផលិតរថយន្តធំៗ ដោយ Tesla មានការខាតបង់ប្រមាណ ៣០០ លានដុល្លារ។

Wall Street Journal ក៏ផ្សាយផងដែរថាក្រុមហ៊ុនផលិតរថយន្តធំជាងគេ ទាំងដប់នៅលើពិភពលោក ដោយមិនរាប់បញ្ចូលក្រុមហ៊ុនផលិតរបស់ចិន អាចនឹងឃើញប្រាក់ចំណេញសុទ្ធធ្លាក់ចុះ 25% នៅចុងឆ្នាំនេះ ៕

ប្រែសម្រួលៈ ណៃ តុលា