សេតវិមានលើកឡើង អំពីលទ្ធភាព ដែលប្រធានាធិបតីអាមេរិក លោក Trump អាចនឹងបំពេញទស្សនកិច្ច ទៅកាន់ប្រទេសរុស្សី
បរទេស ៖ យោងតាមការចេញផ្សាយរបស់ RT សេតវិមានបាននិយាយថា ប្រធានាធិបតីអាមេរិក លោកDonald Trump អាចទៅបំពេញទស្សនកិច្ច នៅប្រទេសរុស្ស៊ី នាពេលខាងមុខ ខណៈដែល លោក Trump ក៏កំពុងត្រៀមជួបសមភាគីរុស្ស៊ីលោក Vladimir Putin រួចហើយនៅសប្តាហ៍នេះ ក្នុងទឹកដីរបស់សហរដ្ឋអាមេរិក ។
មេដឹកនាំទាំងពីរគ្រោងនឹង ជួបពិភាក្សាគ្នានៅរដ្ឋអាឡាស្ការបស់សហរដ្ឋអាមេរិកនៅថ្ងៃទី១៥ខែសីហា ដោយកិច្ចពិភាក្សារំពឹងថា នឹងផ្តោតលើការដោះស្រាយ ជម្លោះអ៊ុយក្រែន និងការពង្រឹងទំនាក់ទំនងទ្វេភាគី។
នៅពេលសួរដោយអ្នកសារព័ត៌មានកាលពីថ្ងៃអង្គារថា តើលោក Trump មានគម្រោងទៅបំពេញទស្សនកិច្ច នៅប្រទេសរុស្ស៊ីឬយ៉ាងណានោះ អ្នកនាំពាក្យសេតវិមានលោកស្រី Karoline Leavitt បាននិយាយថា ៖ វាជារឿងដែលអាចទៅរួចដែលថា មានគម្រោងធ្វើដំណើរទៅកាន់ប្រទេសរុស្ស៊ី នាពេលអនាគត ។
គួរឲ្យដឹងដែរថាទីក្រុងមូស្គូធ្លាប់បានបញ្ជាក់ថា ខ្លួនរំពឹងថាជំនួបបន្ទាប់របស់មេដឹកនាំទាំងពីរ បន្ទាប់ពីរដ្ឋអាឡាស្កានឹងធ្វើឡើងនៅរុស្ស៊ី។ លោក Yury Ushakov ជំនួយការវិមានក្រឹមឡាំងបាននិយាយកាលពីសប្តាហ៍មុនថា Trump គឺបានទទួលលិខិតអញ្ជើញជាផ្លូវការរួចមកហើយដែរ៕
ប្រែសម្រួល៖ស៊ុនលី
