ប្រធានាធិបតីអាមេរិក លោក Donald Trump ទទួលស្គាល់ថា កិច្ចប្រជុំកំពូល របស់លោកជាមួយលោក ពូទីន អាចនឹងបរាជ័យ
បរទេស៖ ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ បានទទួលស្គាល់ថា កិច្ចប្រជុំកំពូល របស់គាត់ជាមួយលោក វ្ល៉ាឌីមៀ ពូទីន អាចនឹងបរាជ័យ ហើយបាននិយាយថា កិច្ចព្រមព្រៀងណា មួយរបស់អ៊ុយក្រែន នឹងកើតឡើងតាមរយៈកិច្ចប្រជុំបីភាគីនាពេលអនាគត ជាមួយទីក្រុងគៀវ ដើម្បី “ផ្លាស់ប្តូររឿង” ។
យោងតាមសារព័ត៌មាន The Moscow Times ចេញផ្សាយកាលពីថ្ងៃទី១៤ ខែសីហា ឆ្នាំ២០២៥ បានឱ្យដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានធ្វើដំណើរទៅកាន់រដ្ឋអាឡាស្កា សហរដ្ឋអាមេរិក នៅថ្ងៃសុក្រ តាមការអញ្ជើញរបស់លោក Trump ក្នុងដំណើរទស្សនកិច្ចលើកដំបូង របស់លោកទៅកាន់ប្រទេស លោកខាងលិច ចាប់តាំងពីលោកបានបញ្ជា ឱ្យមានការលុកលុយអ៊ុយក្រែនឆ្នាំ ២០២២ ដែលបានសម្លាប់ មនុស្សរាប់ម៉ឺននាក់។
វិមានក្រឹមឡាំងបាននិយាយថា ប្រធានាធិបតីទាំងពីរ គ្រោងនឹងជួបទល់មុខគ្នា ដែលបង្កើនការភ័យខ្លាច ដោយមេដឹកនាំអឺរ៉ុបថា លោកពូទីន នឹងលួងលោមលោក Trump ចូលទៅក្នុងដំណោះស្រាយ ដែលដាក់លើអ៊ុយក្រែន។
លោក Trump នៅមុនកិច្ចប្រជុំកំពូលបានទទូចថា លោកនឹងមិនសម្រេចកិច្ចព្រមព្រៀងណាមួយជាមួយលោក ពូទីន នោះទេ ហើយថាលោកនឹងរួមជាមួយប្រធានាធិបតី អ៊ុយក្រែនលោក Volodymyr Zelensky នៅក្នុងការសម្រេចចិត្តណាមួយ៕
ប្រែសម្រួលៈ ណៃ តុលា
