អាមេរិក ស្វែងរកអ្នកជំនាញ ខាងសាងសង់កប៉ាល់ ពីកូរ៉េខាងត្បូង និងជប៉ុន ដើម្បីទប់ទល់នឹងចិន
វ៉ាស៊ីនតោន៖ សមាជិកសភាអាមេរិក កំពុងប្រើប្រាស់ដំណើរកម្សាន្តទៅកាន់កូរ៉េខាងត្បូង និងជប៉ុន ដើម្បីស្វែងយល់ពីរបៀប ដែលសហរដ្ឋអាមេរិក អាចទាញយកជំនាញ និងសមត្ថភាពសាងសង់កប៉ាល់ របស់សម្ព័ន្ធមិត្តទាំងនោះ ដើម្បីជួយលើកកំពស់សមត្ថភាពរបស់ខ្លួន ដែលមានភាពខ្វះខាត ក្នុងគោលបំណងទប់ទល់នឹងប្រទេសចិន ។
លោកស្រី Tammy Duckworth, D-Ill., និងលោក Andy Kim, D-N.J. ដែលគ្រោងនឹងទស្សនកិច្ច នៅទីក្រុងសេអ៊ូលនៅថ្ងៃអាទិត្យ មុនពេលធ្វើដំណើរ ទៅកាន់ប្រទេសជប៉ុន គ្រោងជួបជាមួយក្រុមហ៊ុនសាងសង់កប៉ាល់កំពូល មកពីបណ្តាប្រទេសផលិតកប៉ាល់ធំជាងគេទីពីរ និងទីបីរបស់ពិភពលោក។ សមាជិកព្រឹទ្ធសភារូបនេះ ចង់ពិនិត្យមើលលទ្ធភាព នៃការបង្កើតក្រុមហ៊ុនបណ្តាក់ទុន រួមគ្នាក្នុងការសាងសង់ និងជួសជុលនាវា ដែលមិនប្រយុទ្ធ សម្រាប់កងទ័ពជើងទឹក សហរដ្ឋអាមេរិកនៅឥណ្ឌូប៉ាស៊ីហ្វិក និងនាំយកការវិនិយោគ ទៅកាន់កន្លែងផលិតកប៉ាល់អាមេរិក។
លោកស្រី Duckworth បានប្រាប់សារព័ត៌មាន The Associated Press ថា “យើងមានសមត្ថភាពតិចជាងយើង បានធ្វើក្នុងអំឡុងពេលប្រតិបត្តិការ សេរីភាពអ៊ីរ៉ាក់” ក្នុងឆ្នាំ២០០៣ ។ យើងត្រូវតែកសាងសមត្ថភាពឡើងវិញ។ ទន្ទឹមនឹងនោះ សមត្ថភាពអ្វីដែលយើងមានគឺភាពចាស់ និងខូច ហើយចំណាយពេលយូរ និងថ្លៃជាងក្នុងការជួសជុល ។
ដំណើរទស្សនកិច្ចរបស់អ្នកទាំងពីរ ធ្វើឡើង ស្របពេលដែលលោកប្រធានាធិបតី ដូណាល់ ត្រាំ ទាមទារឱ្យមានផែនការស្តារកន្លែងផលិតនាវា របស់សហរដ្ឋអាមេរិក និងចូលរួមជាមួយដៃគូបរទេស ។ មន្ទីរបញ្ចកោណកំពុងស្វែងរក ៤៧ ពាន់លានដុល្លារ សម្រាប់ការកសាងនាវានៅក្នុង ថវិកាប្រចាំឆ្នាំរបស់ខ្លួន។ ភាពបន្ទាន់នេះកើតចេញ ពីការពិតដែលថា ទីក្រុងវ៉ាស៊ីនតោន មានភាពយឺតយ៉ាវយ៉ាងខ្លាំងនៅពីក្រោយប្រទេសចិន ក្នុងការសាងសង់កប៉ាល់កងទ័ពជើងទឹក ស្ថានភាពដែលបង្កើនការប្រកាសអាសន្ន ក្នុងចំណោមអ្នកបង្កើត គោលនយោបាយ ដែលបារម្ភថាតុល្យភាពដែនសមុទ្រ អាចផ្លាស់ប្តូរទៅប្រទេសចិន ដែលឥឡូវនេះជាអ្នកសាងសង់កប៉ាល់លេខ ១ របស់ពិភពលោក។
លោកស្រី Duckworth ដែលបម្រើការនៅគណៈកម្មាធិការសេវាកម្ម ប្រដាប់អាវុធព្រឹទ្ធសភាបានឲ្យដឹងថា លោកស្រី សង្ឃឹមថាការធ្វើដំណើរនេះ អាចនាំឱ្យមានការបណ្តាក់ទុនរួមគ្នា ក្នុងចំណោមយោធាសហរដ្ឋអាមេរិក ក្រុមហ៊ុនអាមេរិក និងដៃគូបរទេសដើម្បីបង្កើតនាវាជំនួយសម្រាប់កងទ័ពជើងទឹក និងទូកតូចៗសម្រាប់កងទ័ព ៕
ប្រែសម្រួល ឈូក បូរ៉ា
