លោក គីម ជុងអ៊ុន រិះគន់សមយុទ្ធ អាមេរិក-កូរ៉េខាងត្បូង ថាជាការប៉ុនប៉ង បញ្ឆេះសង្គ្រាម
ប៉េកាំង ៖ មេដឹកនាំកូរ៉េខាងជើង លោក គីម ជុងអ៊ុន បានរិះគន់ការធ្វើសមយុទ្ធយោធារួមគ្នាដោយសហរដ្ឋអាមេរិក និងកូរ៉េខាងត្បូង ដោយនិយាយថា វាបង្ហាញពី “ឆន្ទៈរបស់ពួកគេក្នុងការបញ្ឆេះសង្រ្គាម” និងអាចនាំទៅដល់ការបំផ្លាញសន្តិភាព និងសន្តិសុខក្នុងតំបន់។
លោក គីម ជុងអ៊ុន បានធ្វើការកត់ សម្គាល់កាលពីថ្ងៃមុន ខណៈដែលលោកបានត្រួតពិនិត្យ ការសាកល្បងប្រតិបត្តិការប្រព័ន្ធ សព្វាវុធនៃនាវាពិឃាតពហុបំណងទម្ងន់ ៥០០០ តោន ដែលត្រូវបានដាក់ឱ្យដំណើរការជាផ្លូវការ នៅទីក្រុងកំពង់ផែ Nampho ភាគខាងលិចក្នុងខែមេសា។
លោកក៏បានអំពាវនាវឱ្យមាន “ការពង្រីកយ៉ាងឆាប់រហ័ស” នៃឃ្លាំងអាវុធនុយក្លេអ៊ែររបស់ប្រទេស ដោយលើកឡើងនូវអ្វីដែលលោកហៅថា បរិយាកាសសន្តិសុខធ្ងន់ធ្ងរ ដែលទីក្រុងព្យុងយ៉ាងប្រឈមមុខ នេះបើយោងតាមរបាយការណ៍របស់ទីភ្នាក់ងារសារព័ត៌មានកណ្តាលកូរ៉េ។
កាលពីថ្ងៃច័ន្ទ ទីក្រុងសេអ៊ូល និងវ៉ាស៊ីនតោន បានចាប់ផ្តើមសមយុទ្ធ Ulchi Freedom Shield រយៈពេល ១១ថ្ងៃ ដើម្បីបង្កើនការត្រៀមខ្លួន របស់ពួកគេប្រឆាំង នឹងការគំរាមកំហែងពីកូរ៉េខាងជើង ប៉ុន្តែប្រហែលពាក់កណ្តាល នៃសមយុទ្ធត្រូវបានពន្យារពេល ដល់ខែកញ្ញានៅក្នុងការផ្លាស់ប្តូរមួយ ដែលត្រូវបានគេមើលឃើញថា ជាផ្នែកនៃវិធីសាស្រ្តផ្សះផ្សាទៅកាន់កូរ៉េខាងជើង ដែលធ្វើឡើងដោយប្រធានាធិបតី កូរ៉េខាងត្បូងថ្មីលោក Lee Jae Myung។
ទោះបីជាយ៉ាងណាក៏ដោយ លោក គីម ជងអ៊ុនបានឲ្យដឹងថា សមយុទ្ធប្រចាំឆ្នាំនេះ គូសបញ្ជាក់យ៉ាងច្បាស់នូវ “ចេតនារបស់ប្រទេសទាំងពីរ ដើម្បីរក្សាអរិភាព និង ការប្រឈមមុខដាក់គ្នាបំផុត” ចំពោះកូរ៉េខាងជើង ដោយបន្ថែមថា ពួកគេបាននឹងកំពុង “រៀបចំផែនការ ទំនាក់ទំនងយោធានាពេលថ្មីៗនេះ ជាមួយនឹងធាតុផ្សំនុយក្លេអ៊ែរ”។
KCNA បានចុះផ្សាយថា បន្ទាប់ពីបានសង្កេតការសាកល្បងប្រព័ន្ធ សព្វាវុធរបស់នាវាពិឃាត Choe Hyon លោក គីម បានសម្តែងការពេញចិត្ត ចំពោះវឌ្ឍនភាព ដែលសម្រេចបានក្នុងការធ្វើឱ្យកងទ័ពជើងទឹករបស់ប្រទេសនេះ “បច្ចេកវិទ្យាខ្ពស់ និងអាវុធនុយក្លេអ៊ែរ” ។
ដោយទទួលបានរបាយការណ៍ស្តីពីនាវាពិឃាតទម្ងន់ ៥០០០តោនទីបីដែលកំពុងត្រូវបានសាងសង់នៅឯកន្លែងផលិតកប៉ាល់ Nampho លោក គីម បានឧ្យដឹងថា វាគឺជា “កិច្ចការរដ្ឋដ៏ សំខាន់បំផុត” ដើម្បី “អភិវឌ្ឍយ៉ាងឆាប់រហ័ស” នូវសមត្ថភាពរបស់កងទ័ពជើងទឹក របស់ប្រទេសក្នុងការជំរុញ ការការពារជាតិ នេះបើយោងតាមទីភ្នាក់ងារសារព័ត៌មាន៕
