លោក Trump ចង់ធ្វើឲ្យបានកិច្ចព្រមព្រៀង នុយក្លេអ៊ែរ ដែលមានទាំងរុស្សី និងចិន ចូលរួមហត្ថលេខា
បរទេស ៖ យោងតាមការចេញផ្សាយRT ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទ ដោយបង្ហាញថា លោកបានពិភាក្សាអំពីកម្មវិធីការរំសាយ អាវុធនុយក្លេអ៊ែរ ជាមួយសមភាគីរុស្ស៊ី លោក Vladimir Putin ក្នុងអំឡុងកិច្ចប្រជុំនាពេលថ្មីៗនេះ នៅរដ្ឋអាឡាស្កា ។
ប្រធានាធិបតីអាមេរិក បានធ្វើការកត់សម្គាល់នេះ ខណៈកំពុងនិយាយទៅកាន់អ្នកកាសែត នៅការិយាល័យប្រធានាធិបតី ដោយអះអាងថា លោក Putin ក៏បានបង្ហាញចំណាប់អារម្មណ៍ ចំពោះបញ្ហានេះក្នុងអំឡុងកិច្ចប្រជុំកំពូលនេះដែរ ។
លោក Trump បាននិយាយថា៖យើងចង់រំសាយអាវុធនុយក្លេអ៊ែរ។ វាមានថាមពលខ្លាំងពេក ហើយយើងក៏បាននិយាយអំពីវាផងដែរ។
លោកបញ្ជាក់ទៀតថា៖វាជាថ្ងៃជោគជ័យខ្លាំងណាស់ សម្រាប់រឿងផ្សេងទៀត ព្រោះអ្នកដឹងទេ យើងក៏កំពុងនិយាយអំពីមីស៊ីល នុយក្លេអ៊ែរ យើងកំពុងនិយាយអំពីរឿងផ្សេងគ្នាជាច្រើន ។
យើងកំពុងនិយាយអំពីការកំណត់នុយក្លេអ៊ែរ យើងនឹងចរចាយ៉ាងណាដើម្បីធ្វើឱ្យចិនចូលរួមទៅក្នុងកិច្ចការងារនោះផងដែរ។ យើងមានច្រើនជាងគេ រុស្ស៊ីមានច្រើនជាងគេទីពីរ ហើយចិន បានទីបី ។ យ៉ាងណាក្តីបើទោះបីជាចិននៅពីក្រោយ ប៉ុន្តែពួកគេនឹងឡើងមកដល់កម្រិត របស់យើងក្នុងរយៈពេល៥ឆ្នាំទៀតប៉ុណ្ណោះ ។
ភ្លាមៗនោះ គេមិនទាន់ដឹងច្បាស់ថា តើការវាយតម្លៃរបស់ប្រធានាធិបតីអាមេរិក ទៅលើឃ្លាំងអាវុធនុយក្លេអ៊ែររបស់ប្រទេសទាំងបី គឺផ្អែកលើអ្វីនោះទេ។ យោងតាមតួលេខចុងក្រោយដោយវិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) ប្រទេសរុស្ស៊ីមានក្បាលគ្រាប់ចំនួន២៥៩១គ្រាប់ នៅក្នុងឃ្លាំង និង១៧១៨គ្រាប់ត្រូវបានគេដាក់ពង្រាយ បើធៀបនឹង១៩៣០គ្រាប់និង១៧៧០គ្រាប់រៀងគ្នានៅក្នុងឃ្លាំងអាវុធរបស់សហរដ្ឋអាមេរិក៕
ប្រែសម្រួល៖ស៊ុនលី
Recommended for you
