បណ្តាប្រទេសនៅអឺរ៉ុប ជូនដំណឹងដល់អ៊ីរ៉ង់ អំពីផែនការ ដាក់ទណ្ឌកម្មឡើងវិញ
តេអេរ៉ង់៖ ប្រទេសនៅអឺរ៉ុបចំនួនបីគឺ បារាំង អង់គ្លេស និងអាល្លឺម៉ង់ ដែលហៅថា E3 ក៏ដូចជាសហភាពអឺរ៉ុប បានជូនដំណឹងដល់ប្រទេសអ៊ីរ៉ង់ កាលពីថ្ងៃព្រហស្បតិ៍ អំពីចេតនារបស់ពួកគេក្នុង ការដាក់ទណ្ឌកម្មឡើងវិញ លើទីក្រុងតេអេរ៉ង់។
នៅក្នុងការសន្ទនាតាមទូរស័ព្ទ រដ្ឋមន្ត្រីការបរទេសអង់គ្លេស លោក David Lammy រដ្ឋមន្ត្រីការបរទេសបារាំង Jean-Noel Barrot រដ្ឋមន្ត្រីការបរទេសអាល្លឺម៉ង់ Johann Wadephul និងប្រធានគោលនយោបាយការបរទេសរបស់អឺរ៉ុបលោកស្រី Kaja Kallas បានប្រាប់រដ្ឋមន្ត្រីការបរទេសអ៊ីរ៉ង់លោក Abbas Araghchi ថា ពួកគេគ្រោងនឹងជូនដំណឹងជាផ្លូវការទៅកាន់ក្រុមប្រឹក្សាសន្តិសុខអង្គការសហប្រជាជាតិ (UNSC) អំពីការចាប់ផ្តើមនៃដំណើរការបង្កើតយន្តការ snapback។
យន្ដការ “snapback” ដែលជាផ្នែកមួយនៃកិច្ចព្រមព្រៀងនុយក្លេអ៊ែរឆ្នាំ២០១៥ ដែលត្រូវបានគេស្គាល់ជាផ្លូវការថាជាផែនការសកម្មភាពទូលំទូលាយរួម (JCPOA) រវាងអ៊ីរ៉ង់ និងមហាអំណាចពិភពលោក អនុញ្ញាតឱ្យភាគីផ្សេងទៀតដាក់ទណ្ឌកម្មអន្តរជាតិឡើងវិញ ប្រសិនបើអ៊ីរ៉ង់ មិនគោរពតាមកិច្ចព្រមព្រៀងនោះ។
យោងតាមសេចក្តីថ្លែងការណ៍នោះ ប្រជាជនអឺរ៉ុប ក៏បានសម្តែងការត្រៀមខ្លួនរបស់ពួកគេក្នុងការស្វែងរកដំណោះស្រាយការទូតក្នុងរយៈពេល ៣០ថ្ងៃខាងមុខ ដើម្បីដោះស្រាយភាពខុសគ្នា និងទប់ស្កាត់ការវិលត្រឡប់នៃដំណោះស្រាយទណ្ឌកម្មរបស់ UNSC ។
រដ្ឋមន្ត្រីការបរទេសអ៊ីរ៉ង់ បានពណ៌នាចំណាត់ការនេះថា “មិនសមហេតុផល ខុសច្បាប់ និងមិនមានមូលដ្ឋានច្បាប់ណាមួយ” ដោយរំឭកពួកគេអំពីការអនុវត្ត “ប្រកបដោយការទទួលខុសត្រូវ និងសុច្ឆន្ទៈ” របស់អ៊ីរ៉ង់ក្នុងការបន្តប្តេជ្ញាចិត្ត ចំពោះការទូត សម្រាប់ការដោះស្រាយបញ្ហានុយក្លេអ៊ែរ៕
ប្រែសម្រួល ឈូក បូរ៉ា
