អាមេរិក ប្រាប់ឲ្យដាណឺម៉ាក់ ត្រជាក់ចិត្តជុំវិញ បញ្ហារបស់ទឹកដី Greenland
បរទេស ៖ យោងតាមការចេញផ្សាយរបស់ RT ទីក្រុងវ៉ាស៊ីនតោន បានប្រាប់ទីក្រុង Copenhagen ឱ្យ ស្ងប់ស្ងាត់និង ត្រជាក់ចិត្តឡើងបន្ទាប់ពីក្រុមការងារ របស់ខ្លួនត្រូវបានកោះហៅ ដោយរដ្ឋមន្ត្រីការបរទេសដាណឺម៉ាកជុំវិញ ប្រតិបត្តិការឥទ្ធិពល របស់សហរដ្ឋអាមេរិក ដើម្បីរុញច្រាន Greenland ទៅរកការបំបែកខ្លួនខណៈដែល កោះនេះគឺជាទឹកដីស្វយ័តមួយ នៅក្នុងព្រះរាជាណាចក្រដាណឺម៉ាក។
ការតវ៉ារបស់រដ្ឋាភិបាល ទីក្រុង Copenhagen បានកើតឡើង បន្ទាប់ពីប្រព័ន្ធផ្សព្វផ្សាយ ក្នុងស្រុកបានរាយការណ៍ថា យ៉ាងហោចណាស់ជនជាតិ អាមេរិកបីនាក់ ដែលមានទំនាក់ទំនងជាមួយប្រធានាធិបតីអាមេរិក Donald Trump ត្រូវបានគេចោទប្រកាន់ថា បានធ្វើការ ដើម្បីធ្វើឱ្យទំនាក់ទំនងរវាង Greenland និង Denmark ចុះខ្សោយ និងជ្រើសរើសមនុស្ស សម្រាប់ចលនាធ្វើអបគមន៍។
រដ្ឋមន្ត្រីការបរទេសដាណឺម៉ាក Lars Lokke Rasmussen បាននិយាយកាលពីថ្ងៃពុធថា ការប៉ុនប៉ងបែបនេះមិនអាចទទួលយកបានទេ ហើយបានបញ្ជាឱ្យសហរដ្ឋអាមេរិក បង្ហាញមុខនៅក្រសួង សម្រាប់កិច្ចពិភាក្សាផងដែរ។
អ្នកនាំពាក្យក្រសួងការបរទេសបានបញ្ជាក់ថា ក្រុមមន្ត្រីអាមេរិកបានជួបជាមួយលោក Rasmussen និងមានការសន្ទនាប្រកបដោយផលិតភាព ដែល បញ្ជាក់ឡើងវិញនូវទំនាក់ទំនងដ៏រឹងមាំ រវាង Greenland ដាណឺម៉ាក និងសហរដ្ឋអាមេរិក។
យ៉ាងណាក្តីទន្ទឹមគ្នានឹងនេះដែរ សេតវិមានបានបដិសេធមិនបញ្ជាក់ថាតើយុទ្ធនាការឥទ្ធិពលណាមួយកំពុងដំណើរការទេ ដោយមន្ត្រីរដ្ឋាភិបាលម្នាក់បានប្រាប់ CBS News កាលពីថ្ងៃពុធថា ៖យើងគិតថាដាណឺម៉ាក ចាំបាច់ត្រូវស្ងប់ស្ងាត់និងត្រជាក់ចិត្តជាងនេះបន្តិចទៅ៕
ជាយូរមកហើយលោកប្រធានាធិបតី អាមេរិក Donald Trump តែងតែបញ្ជាក់ថា គាត់ចង់នាំយក ទឹកដីGreenland ឱ្យស្ថិតនៅក្រោមការគ្រប់គ្រង របស់សហរដ្ឋអាមេរិកដោយហៅកោះ ដែលមានមនុស្សតិចជាង៦ម៉ឺននាក់ នាក់នេះជាទ្រព្យសម្បត្តិដ៏សំខាន់ ជាយុទ្ធសាស្ត្ររបស់អាមេរិក៕
ប្រែសម្រួល៖ស៊ុនលី
