កិច្ចប្រជុំ G20 នឹងដំណើរការទៅ ជាធម្មតា ទោះបីជាវត្តមានរបស់លោក Trump មិនទាន់ច្បាស់លាស់នៅឡើយក្តី
បរទេស ៖ យោងតាមការចេញផ្សាយរបស់ RT ប្រទេសអាហ្រ្វិកខាងត្បូងបានអះអាងឡើងវិញ នូវជំហររបស់ខ្លួនថា កិច្ចប្រជុំកំពូល G20 នាពេលខាងមុខនៅទីក្រុងJohannesburgក្នុងខែវិច្ឆិកានឹងប្រព្រឹត្តទៅដោយមាន ឬគ្មានប្រធានាធិបតីសហរដ្ឋអាមេរិក Donald Trump ។
រដ្ឋមន្ត្រីក្រសួងទំនាក់ទំនងអន្តរជាតិ និងសហប្រតិបត្តិការ អន្តរជាតិ លោក Ronald Lamola បានសង្កត់ធ្ងន់ថា ប្រទេសអាហ្វ្រិកខាងត្បូង ប្តេជ្ញាធ្វើឱ្យកិច្ចប្រជុំកំពូល G20 ទទួលបានជោគជ័យ ដោយមិនគិតពីថាតើលោក Trump ចូលរួម ឬបញ្ជូនអ្នកតំណាងឡើយ។
ថ្លែងនៅក្នុងសន្និសីទសារព័ត៌មាននៅទីក្រុង Pretoria កាលពីថ្ងៃពុធ លោកបាននិយាយថា ៖យើងនឹងបន្តជាមួយ G20 ដោយមានឬគ្មានប្រធានាធិបតី Trump និងជាមួយអ្នកណាដែលគាត់នឹងធ្វើប្រតិភូឱ្យមក G20ឬក៏យ៉ាងណា។
គួរឲ្យដឹងដែរថាកន្លងមកលោក Trump ធ្លាប់បានបង្ហើបថាគាត់ប្រហែលជាមិនចូលរួមក្នុងកិច្ចប្រជុំកំពូលដោយលើកឡើងពី គោលនយោបាយដ៏អាក្រក់ដែលកំពុងមាននៅក្នុងប្រទេសអាហ្វ្រិកខាងត្បូង។
ទោះជាយ៉ាងណាក៏ដោយលោក Lamola បានបង្ហាញភាពមិនច្បាស់លាស់អំពីការសម្រេចចិត្តចុងក្រោយរបស់លោក Trump ដោយបញ្ជាក់ថា រដ្ឋាភិបាលអាហ្វ្រិកខាងត្បូងនៅតែរង់ចាំការបញ្ជាក់ពីសំណាក់សហរដ្ឋអាមេរិកដដែល៕
ប្រែសម្រួល៖ស៊ុនលី
