អូស្ត្រាលី កាណាដា និងហ្វីលីពីន ធ្វើសមយុទ្ធការពារដែនអាកាស ជុំវិញដែនទឹកការពារដោយចិន
ម៉ានីល ៖ អូស្ត្រាលី កាណាដា និងហ្វីលីពីន បានដាក់ពង្រាយនាវាចម្បាំង និងយន្តហោះចំនួនបីគ្រឿង កាលពីថ្ងៃពុធ សម្រាប់សមយុទ្ធប្រឆាំង នឹងការគម្រាមកំហែងពីលើអាកាស ចេញពីតំបន់ជម្លោះសមុទ្រចិនខាងត្បូង ដែលកងកម្លាំងចិន បានប្រើសមយុទ្ធប្រថុយប្រថាន ដើម្បីព្យាយាមបណ្តេញយន្តហោះ និងកប៉ាល់របស់ទីក្រុងម៉ានីល ។
យោធាហ្វីលីពីនបានឲ្យដឹងថា សមយុទ្ធកងទ័ពជើងទឹកនៅភាគខាងកើតនៃតំបន់ Scarborough Shoal ត្រូវបានបញ្ចប់ដោយសុវត្ថិភាព ប៉ុន្ដែប្រទេសនេះមិនបាននិយាយអំពីការជួបជាមួយឆ្មាំសមុទ្រ កងទ័ពជើងទឹក និងកប៉ាល់កងជីវពល ដែលសង្ស័យថា បានល្បាតយ៉ាងជិតស្និត ចំពោះដែននេសាទ ដែលគ្មានមនុស្សរស់នៅនៅភាគពាយ័ព្យហ្វីលីពីន អស់រយៈពេលជាច្រើនឆ្នាំមកនោះទេ។
មន្ត្រីចិនមិនបានចេញសេចក្តីអត្ថាធិប្បាយភ្លាមៗ អំពីសមយុទ្ធកងទ័ពជើងទឹកនោះទេ ប៉ុន្តែពួកគេបានព្រមានម្តងហើយម្តងទៀតថា ពួកគេនឹងការពារច្រាំងថ្មចោទ និងដែនទឹកខាងក្រៅ ដែលពួកគេអះអាងថាជាទឹកដីរបស់ទីក្រុងប៉េកាំង ក្នុងតម្លៃទាំងអស់។
ចិន និងហ្វីលីពីន ទាមទារយកកោះ Scarborough និងកោះតូចៗ និងថ្មប៉ប្រះទឹកផ្សេងទៀតនៅក្នុងសមុទ្រចិនខាងត្បូង។ វៀតណាម ម៉ាឡេស៊ី ប្រ៊ុយណេ និងតៃវ៉ាន់ ក៏បានដាក់ការទាមទារត្រួតស៊ីគ្នា នៅក្នុងផ្លូវទឹកដ៏មមាញឹក ដែលជាផ្លូវពាណិជ្ជកម្មសកលដ៏សំខាន់មួយ។
សហរដ្ឋអាមេរិកមិនមានការទាមទារអ្វីទេ ប៉ុន្តែបានចោទសួរការអះអាងរបស់ចិន ចំពោះការឆ្លងកាត់សមុទ្រស្ទើរតែទាំងមូល រួមទាំងទៅ Scarborough ផងដែរ។ នាវាចម្បាំងអាមេរិកពីរគ្រឿង បានធ្វើដំណើរចេញពីទីតាំងរបស់ខ្លួនក្នុងខែនេះ ដើម្បីលើកកម្ពស់សេរីភាពនៃការធ្វើនាវាចរណ៍ ហើយត្រូវបានតាមប្រកៀកដោយនាវាកងទ័ពជើងទឹកចិន។
ដោយធ្វើដំណើរពីខេត្តភាគខាងលិចប្រទេសហ្វីលីពីន នាវាពិឃាតបំពាក់ដោយមីស៊ីលនាំផ្លួវ Royal Australian Navy HMAS Brisbane នាវាចម្បាំងរបស់កងទ័ពជើងទឹកកាណាដា HMCS Ville de Quebec និងនាវាចម្បាំងបំពាក់ដោយមីស៊ីល BRP របស់កងទ័ពជើងទឹកហ្វីលីពីន Jose Rizal បានធ្វើសមយុទ្ធនៅភាគខាងកើត ៕
ប្រែសម្រួល ឈូក បូរ៉ា
