បណ្តាប្រទេសនៅអឺរ៉ុប ជំរុញឱ្យ ប្លុកអឺរ៉ុប ពង្រឹងជំហរលើអ៊ីស្រាអែល
ឡាអេ៖ បណ្តាប្រទេសអ៊ឺរ៉ុបរួម ទាំងហូឡង់ ស៊ុយអែត និង ស្លូវេនី បានអំពាវនាវឱ្យសហភាពអឺរ៉ុប បង្កើនសម្ពាធលើអ៊ីស្រាអែល និងចាត់វិធានការកាន់តែខ្លាំង ទាក់ទងនឹងស្ថានភាពហ្គាហ្សា។
ដោយលើកឡើងពីវិបត្តិមនុស្សធម៌ “មិនអាចអត់ឱនបាន” នៅតំបន់ហ្គាហ្សា និងការពង្រីកការតាំងទីលំនៅនៅតំបន់ West Bank ហូឡង់ និងស៊ុយអែត បានជំរុញឱ្យប្រទេសជាសមាជិកសហភាពអឺរ៉ុប បង្កើនសម្ពាធលើអ៊ីស្រាអែល។
នៅក្នុងលិខិតមួយចុះថ្ងៃទី២៧ ខែសីហា ផ្ញើជូនប្រធានគោលនយោបាយការបរទេសរបស់សហភាពអឺរ៉ុបលោកស្រី Kaja Kallas រដ្ឋមន្ត្រីការបរទេសហូឡង់លោក Ruben Brekelmans និងសមភាគីស៊ុយអែត Maria Malmer Stenergard បានឧ្យដឹងថា “ចាំបាច់ត្រូវធ្វើបន្ថែមទៀត ដើម្បីជំរុញសម្ពាធលើរដ្ឋាភិបាលអ៊ីស្រាអែល ឱ្យផ្លាស់ប្តូរទិសដៅរបស់ខ្លួន និងបំពេញកាតព្វកិច្ចរបស់ខ្លួនតាមច្បាប់អន្តរជាតិ” ។
រដ្ឋមន្ត្រីបានស្នើដាក់ ទណ្ឌកម្មប្រឆាំង នឹងអ្នកតាំងលំនៅដោយហិង្សានៅតំបន់ West Bank និង “រដ្ឋមន្ត្រីអ៊ីស្រាអែល ជ្រុលនិយម” ដែល “ជំរុញសកម្មភាព តាំងទីលំនៅខុសច្បាប់ និងធ្វើការយ៉ាងសកម្មប្រឆាំង នឹងដំណោះស្រាយរដ្ឋពីរដែលបានចរចា” ។
លិខិតនោះបានឧ្យដឹងទៀតថា “ស្ថានភាពមនុស្សធម៌នៅហ្គាហ្សា នៅតែគួរឱ្យព្រួយបារម្ភ និងមិនអាចអត់ឱនបាន។ ការឈឺចាប់របស់ជនស៊ីវិល គឺហួសថ្លែង” ដោយបន្ថែមថា ការចែកចាយជំនួយត្រូវតែត្រូវ បានអនុញ្ញាតនៅទូទាំង តំបន់ហ្គាហ្សា៕
ប្រែសម្រួល ឈូក បូរ៉ា
