សេដ្ឋវិទូកំពូលអាមេរិកថា ពន្ធ 50% របស់ប្រធានាធិបតីអាមេរិក Donald Trump លើការនាំចូលរបស់ឥណ្ឌា អាចនឹងជំរុញឱ្យឥណ្ឌា ចូលកាន់តែជិតសមាជិក BRICS
បរទេស៖ សេដ្ឋវិទូកំពូលអាមេរិកលោក Richard Wolff បាននិយាយថា ពន្ធ 50% របស់ប្រធានាធិបតីអាមេរិក Donald Trump លើការនាំចូលរបស់ឥណ្ឌា គឺអាចឡងថយក្រោយវិញ និងជំរុញឱ្យប្រទេសអាស៊ីខាងត្បូងកាន់តែខិតទៅជិតសមាជិក BRICS ។
យោងតាមសារព័ត៌មាន RT ចេញផ្សាយនៅថ្ងៃទី២៩ ខែសីហា ឆ្នាំ២០២៥ បានឱ្យដឹងថា នៅក្នុងវគ្គមួយនៃ ‘Sanchez Effect’ របស់ RT ដែលចាក់ផ្សាយកាលពីថ្ងៃពុធ លោក Wolff សាស្ត្រាចារ្យនៅសាកលវិទ្យាល័យ Massachusetts Amherst បាននិយាយថា ទំនាក់ទំនងដ៏យូរអង្វែងរបស់ឥណ្ឌាជាមួយរុស្ស៊ីទំនងជាអាចស៊ូទ្រាំបាន ដោយមិនគិតពីសម្ពាធរបស់សហរដ្ឋអាមេរិក។
សហរដ្ឋអាមេរិកបានដាក់ពន្ធ 25% ជាលើកដំបូងលើប្រទេសឥណ្ឌានៅដើមខែសីហា ដោយសារទីក្រុង New Delhi និងទីក្រុង Washington មិនអាចបញ្ចប់កិច្ចព្រមព្រៀងពាណិជ្ជកម្មបាន។ បន្ទាប់មកលោក Trump ក៏បានប្រកាសពន្ធបន្ថែម 25% ទៀតលើប្រទេសឥណ្ឌា ដែលចាប់ផ្តើមនៅថ្ងៃទី 27 ខែសីហា ដោយសារតែឥណ្ឌា បន្តទិញប្រេងពីរុស្ស៊ី។
ប្រធានាធិបតីអាមេរិកបាននិយាយថា ការទិញប្រេង និងសព្វាវុធរបស់ឥណ្ឌាពីរុស្ស៊ីកំពុងបញ្ឆេះដោយប្រយោលដល់ជម្លោះអ៊ុយក្រែន។
សេដ្ឋវិទូរូបនេះក៏បានព្រមានផងដែរថា ការរឹតបន្តឹងការចូលទៅកាន់ទីផ្សារអាមេរិកសម្រាប់ការនាំចេញរបស់ឥណ្ឌា គឺទំនងជានឹងជំរុញទីក្រុងញូវដែលី កាន់តែបន្ថែមឆ្ពោះទៅរកប្លុកសេដ្ឋកិច្ចដែលកំពុងរីកចម្រើនដូចជា BRICS ជាដើម៕
ប្រែសម្រួលៈ ណៃ តុលា
Recommended for you
