លោក Modi នឹងត្រៀមជួបជាមួយនឹងលោក Xi និងលោក Putin នៅក្នុងប្រទេសចិន
បរទេស ៖ យោងតាមការចេញផ្សាយរបស់ RT នាយករដ្ឋមន្ត្រីឥណ្ឌាលោក Narendra Modi បាននិយាយកាលពីថ្ងៃព្រហស្បតិ៍ថា លោកនឹងជួបពិភាក្សា ជាមួយប្រធានាធិបតីរុស្ស៊ី លោក Vladimir Putin និងប្រធានាធិបតីចិន Xi Jinping នៅទីក្រុង Tianjin ប្រទេសចិន។
លោក Modi នឹងធ្វើទស្សនកិច្ចនៅប្រទេសចិននៅថ្ងៃសៅរ៍ សម្រាប់កិច្ចប្រជុំប្រមុខរដ្ឋលើកទី២៥ នៃកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO)។ នៅក្នុងការប្រកាសនៅលើបណ្តាញសង្គម X លោក Modi បាននិយាយថា ប្រទេសឥណ្ឌា បានដើរតួយ៉ាងសកម្ម និងស្ថាបនានៅក្នុង SCO។
លោកបានមានប្រសាសន៍ថា ៖ ប្រទេសឥណ្ឌានឹងបន្តធ្វើការជាមួយសមាជិក SCO ដើម្បីដោះស្រាយបញ្ហាប្រឈមរួមគ្នាផ្សេងៗ។ ខ្ញុំក៏នឹងជួបជាមួយប្រធានាធិបតី Xi Jinping ប្រធានាធិបតី Putin និងមេដឹកនាំផ្សេងទៀត ក្នុងអំឡុងពេលកិច្ចប្រជុំកំពូលនេះផងដែរ ។
SCO គឺជាប្លុកសន្តិសុខអន្តរជាតិ ដែលត្រូវបានបង្កើតឡើងក្នុងឆ្នាំ២០០១ ដោយប្រទេសចិន រុស្ស៊ី តាជីគីស្ថាន កៀហ្ស៊ីស៊ីស្ថាន កាហ្សាក់ស្ថាន និងអ៊ូសបេគីស្ថាន ។ ឥណ្ឌា និងប៉ាគីស្ថានបានក្លាយជាសមាជិកពេញសិទ្ធិនៅខែកក្កដា ឆ្នាំ២០២៣។ ក្រុមឥឡូវនេះមានសមាជិកចំនួន១០រួមទាំងអ៊ីរ៉ង់ និងបេឡារុស ។
គួរឲ្យដឹងដែរថា ដំណើរទស្សនកិច្ចរបស់លោក Modi ទៅកាន់ប្រទេសចិនកើតឡើង នៅពេលដែលទំនាក់ទំនងឥណ្ឌានិងអាមេរិកមានភាពតានតឹងជុំវិញការដំឡើងពន្ធ ៥០ភាគរយ របស់ក្រុងវ៉ាស៊ីនតោន លើការនាំចូលរបស់ឥណ្ឌា ៕
ប្រែសម្រួល៖ស៊ុនលី
