គណបក្ស Bhumjaithai របស់ថៃថា បានត្រៀមខ្លួនជាស្រេច ជាមួយសម្ព័ន្ធមិត្ត ដើម្បីបង្កើតរដ្ឋាភិបាលបណ្តោះអាសន្ន ចំណែកលោក Anutin ប្រាប់ថា បានត្រៀមខ្លួនហើយដែរ ធ្វើជានាយករដ្ឋមន្ត្រីបន្ទាប់
បរទេស៖ គណបក្ស Bhumjaithai របស់ថៃ បានឱ្យដឹងថា ខ្លួនបានត្រៀមខ្លួនជាស្រេច ជាមួយសម្ព័ន្ធមិត្ត ដើម្បីបង្កើតរដ្ឋាភិបាលបណ្តោះអាសន្ន ដោយមានការគាំទ្រពីគណបក្សប្រជាជន ដែលជាគណបក្សធំជាងគេនៅក្នុងសភា និងរំលាយសភាក្នុងរយៈពេល ៤ ខែ។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី៣០ ខែសីហា ឆ្នាំ២០២៥ នេះ បានឱ្យដឹងថា មេដឹកនាំគណបក្ស Bhumjaithai គឺលោក Anutin Charnvirakul កាលពីថ្ងៃសុក្រ បានចាប់ផ្តើមបញ្ចុះបញ្ចូល គណបក្សផ្សេងទៀត ឱ្យគាំទ្រសំណើដែលធ្វើឡើង ដោយគណបក្សប្រជាជន ដែលជាអ្នកឈ្នះការបោះឆ្នោតឆ្នាំ ២០២៣ ដើម្បីបំបែកភាពជាប់គាំង នយោបាយបន្ទាប់ពីតុលាការធម្មនុញ្ញដកលោកស្រី Paetongtarn Shinawatra ចេញពីតំណែងនាយករដ្ឋមន្ត្រី ។
លោក Anutin បានប្រាប់សន្និសីទសារព័ត៌មាន នៅទីស្នាក់ការបក្សកាលពីយប់ថ្ងៃសុក្រថា ក្រុមនៃគណបក្សចម្រុះ ដ៏មានសក្ដានុពល របស់លោកមានសមាជិកសភា គ្រប់គ្រាន់រួចហើយ បន្ថែមពីលើគណបក្សប្រជាជន ដើម្បីបង្កើតរដ្ឋាភិបាលបន្ទាប់ ។ លោកថា លោកបានត្រៀមខ្លួនជានាយករដ្ឋមន្ត្រីបន្ទាប់ផងដែរ ។
គណបក្សប្រជាជនបាននិយាយថា ខ្លួននឹងគាំទ្រដល់ការបង្កើតរដ្ឋាភិបាលថ្មី ក្នុងលក្ខខណ្ឌដែលខ្លួនរំលាយសភានៅចុងឆ្នាំនេះ និងធ្វើប្រជាមតិលើការតាក់តែងរដ្ឋធម្មនុញ្ញថ្មី៕
