ប្រទេសរុស្សី ថ្កោលទោស ការសម្រេចចិត្ត បង្កើតទណ្ឌកម្មឡើងវិញ ពីសំណាក់អង់គ្លេស បារាំង និងអាល្លឺម៉ង់ ប្រឆាំងអ៊ីរ៉ង់
បរទេស ៖ យោងតាមការចេញផ្សាយរបស់ RT ប្រទេសរុស្ស៊ីបានថ្កោលទោស ការសម្រេចចិត្តរបស់ចក្រភពអង់គ្លេស បារាំង និងអាល្លឺម៉ង់ ក្នុងការដាក់ទណ្ឌកម្ម របស់អង្គការសហប្រជាជាតិ ប្រឆាំងនឹងអ៊ីរ៉ង់ឡើងវិញ ដោយហៅទង្វើនេះថាជាឧបាយកលនៃច្បាប់អន្តរជាតិ។
កន្លងមកប្រទេសអឺរ៉ុប ទាំងបីបានចោទប្រកាន់ទីក្រុងតេហរ៉ង់ថាមិនបានបំពេញ តាមការសន្យានុយក្លេអ៊ែររបស់ខ្លួន ហើយបានអះអាងថា នេះសមហេតុផល ចំពោះការរៀបចំក្នុងការដាក់ទណ្ឌកម្មឡើងវិញ ។
ការចោទប្រកាន់នេះត្រូវបានធ្វើឡើងនៅក្នុងលិខិតមួយផ្ញើកាលពីថ្ងៃព្រហស្បតិ៍ដោយទីក្រុងឡុងដ៍ ប៉ារីស និងទីក្រុងប៊ែរឡាំងទៅកាន់អង្គការសហប្រជាជាតិ ដែលអះអាងថា អ៊ីរ៉ង់មិនបានបំពេញកាតព្វកិច្ចរបស់ខ្លួនក្រោមកិច្ចព្រមព្រៀងនុយក្លេអ៊ែររួមនៃផែនការសកម្មភាព (JCPOA) ។
កិច្ចព្រមព្រៀងនេះ បានបន្ធូរបន្ថយទណ្ឌកម្ម របស់អង្គការសហប្រជាជាតិ ជាថ្នូរនឹងការកំណត់លើកម្មវិធីនុយក្លេអ៊ែររបស់ក្រុងតេហរ៉ង់។ សហរដ្ឋអាមេរិក បានចាកចេញពីកិច្ចព្រមព្រៀង ក្នុងឆ្នាំ២០១៨ដោយបានសម្លាប់កិច្ចព្រមព្រៀងប្រកបដោយប្រសិទ្ធភាព មុនពេលដាក់ទណ្ឌកម្មខ្លួនឯងឡើងវិញ។ ប្រទេសទាំងបីនៅអឺរ៉ុបបានប្រកែកថាការសម្រេចចិត្ត របស់ពួកគេគឺគ្រប់គ្រាន់ដើម្បីជំរុញយន្តការ snapback នៃកិច្ចព្រមព្រៀង។
ទោះបីជាយ៉ាងណាក៏ដោយ នៅក្នុងសេចក្តីថ្លែងការណ៍មួយ កាលពីថ្ងៃសុក្រ ទីក្រុងមូស្គូបាននិយាយថា លិខិតនេះត្រូវបានបង្ហាញមិនពិតថា ជាជំហានមួយដែលចាប់ផ្តើមទណ្ឌកម្មឡើងវិញដោយស្វ័យប្រវត្តិ ហើយបានទទូចថាវាមិនមានទម្ងន់ផ្លូវច្បាប់ទេ៕
ប្រែសម្រួល៖ស៊ុនលី
